Filomeno ‘Boey’ Marchena honra pa su aporte na calidad di awa di Aruba

Filomeno ‘Boey’ Marchena honra pa su aporte na calidad di awa di Aruba

ORANJESTAD (AAN): Filomeno ‘Boey’ Marchena, pensionado di WEB y un figura clave den desaroyo di produccion di awa na Aruba,

diabierna ultimo a ricibi un reconocimiento special cu e dedicacion di e centro di control nobo di WEB na su nomber. E homenahe, sostene tambe pa e trahadonan di WEB, ta honra su aporte profesional, su trayectoria academico y su dedicacion na e bon calidad di awa di bebe pa nos isla.

   Den un entrevista cu DIARIO, Marchena a comparti cu durante 30 aña el a contribui na desaroyo di produccion di awa di bebe na WEB. El a recorda cu na 1990, un di su prome tareanan tabata pa mehora e calidad di awa, cu e tempo ey tawatin un color bruin. Segun Marchena, den colaboracion cu e compania Betz a resolve e problema den menos di tres aña, logrando un awa di calidad halto, un di e mihonan di mundo.

   Como ingeniero kimico, Marchena a describi e resultado aki como un logro di gran significado den su carera. El a subraya, sin embargo, cu e exito tabata fruto di e esfuerso di un ekipo dedica. P’esey, e ta considera cu e honor di e dedicacion ta pertenece tambe na tur esnan cu a contribui na e resultado.

   DIARIO ta felicita señor Filomeno ‘Boey’ Marchena cu e reconocimiento mereci aki y ta expresa su aprecio pa su valioso contribucion na calidad di awa di bebe na Aruba. Su trabao y esun di su ekipo a laga un aporte duradero cu ta beneficia nos comunidad te awe.