ORANJESTAD (AAN): E bon noticia a drenta dialuna atardi indicando cu e asina yama 'Food and Drug Administration' (FDA) ta preparando pa autorisa otro siman e uzo di e vacuna di Pfizer-BioNTech den adolescentenan entre 12 y 15 aña.
E plan, segun informe di New York Times, ta cu esaki ta nifica cu asina esaki keda cla lo cuminsa e campaña di vacunacion pa e grupo aki na Merca.
Esaki ta un noticia hopi spera ya cu hopi mayor ta ansioso contando e simannan pa e vacuna bira un realidad for di e momento cu Pfizer a anuncia e resultadonan di nan ensayo den adolescentenan, cual ta demostra cu e vacuna ta altamente efectivo den e grupo aki, mescos cu den adultonan.
E vacunacion di e hobennan ta hopi importante pa aumenta e nivel di inmunidad colectivo (herd immunity) den e poblacion y reduci e number di hospitalisacion y mortonan.
E autorisacion lo por keda cla pa final di e siman aki, segun funcionarionan federal.
