Julie Wever, director tecnico y comercial, ta splica:
ORANJESTAD (AAN) – Fundacion Cas pa Comunidad Arubiano (FCCA) a tene un conferencia di prensa Diabierna, den cual a participa señora Julie Wever, Director Tecnico y Comercial; señor Giovanni Anthony, Director Financiero y di Asunto General, y señora Mayra Janga, Hoof di Hipoteca.
Señora Wever a cuminza pa anuncia un pakete atractivo di hipoteca na un interes reduci, cu FCCA a introduci. E dama a subraya cu FCCA tey pa yuda e pueblo.
“FCCA ta existi pa mas di 40 aña cu e meta pa yuda tur nos ciudadanonan pa yega na nan mesun cas, sea traha, cumpra of huur casnan traha door di FCCA.
Durante su añanan di existencia, FCCA a duna hopi famia oportunidad pa yega na un cas, conforme nan entrada. Actualmente, FCCA tin un gerencia nobo cu hunto cu su personal, ta trahando diligente pa ofrece un servicio y producto pa ofrece na comunidad di Aruba, miho.
Nos a conciente di e situacion economico cu nos pais, actualmente, ta pasando aden. Y pa cumpli cu e deseo di FCCA su clientenan, FCCA ta presenta su pakete atractivo nobo di hipoteca”, señora Julie Wever a señala.
E dama a sigui splica cu e pakete aki ta encera un interes reduci di hipoteca, un seguro na alcance di cada cartera y un aprobacion hopi lihe riba e peticion di hipoteca.
“Ademas, FCCA, ta ofrece conseho y yudanza, na momento di construi bo cas. Nos ta traha tambe cu varios partners cu ta ofrece tambe, descuentonan atractivo. E pakete aki, su beneficio ta cu e cliente ta paga un suma mensual mas abao. Nos tey pa yuda bo. E ta pa clientenan nobo y existente di FCCA”, Wever a reitera.
El a agrega cu e ciudadanonan cu kier cumpra un cas, tereno, remodela of renova nan cas, landscaping, cura, panel di solo, por aplica pa e pakete nobo aki. Cliente existente cu tambe kier haci algun renovacion na cas, por aplica pa e pakete nobo aki. Cada un caso lo wordo analiza, y lo ofrece un interes reduci. Pa aplica, lo mester presenta documentonan manera: ID valido, salario slip, papel di censo, y rapport di taxation.
“Di e manera aki, FCCA ta contribui tambe na bienestar di e economia di Aruba. Ya e cliente por spaar mas placa y tin mas espacio financiero. FCCA ta conoci pa su guia den henter e proceso di construi of remodela bo cas. Nos profesionalnan ta cana man den man cu nan cliente. Ademas, FCCA ta inverti tambe pa mehora nos servicio, y awor por ofrece un servicio mas rapido na comunidad di Aruba”, señora Julie Wever a reitera.
