Minister Maduro di Finansa:
Locual falta ta norma financiero adapta na e realidad financiero post-pandemia
ORANJESTAD (AAN)- Riba e tereno di finansa publico, Aruba a bin ta dal stapnan grandi den e bon direccion. Despues cu na aña 2015 Aruba a conoce supervision financiero debi cu e Gobierno e tempo eynan a laga bay di tur normanan di un finansa publico manehabel, na aña 2017 a cambia e rumbo di finansa publico di Aruba pa bay den un direccion mas manehabel y sostenibel.
E pandemia mes a trece un cambio grandi den e scenario financiero di Aruba, pero e focus di Gobierno pa yega na un finansa publico manehabel y sostenibel, a keda mesun cos. Locual falta ta normanan financiero adapta na e realidad financiero post-pandemia.
Di deficit pa surplus
Aruba a core cu deficitnan grandi den e periodo di 2010 pa 2015. Esey tabata motibo tambe pakico Aruba a wordo someti na supervision financiero. Na aña 2017 Gobierno a cambia di signatura y di rumbo y na aña 2018 Gabinete Wever-Croes a prepara un plan financiero y economico pa stipula e pasonan cu Gobierno lo tuma pa cambia e rumbo financiero di Aruba. Asina por constata cu na fin di aña 2019 a logra yega na un surplus, despues cu pa 12 aña largo Aruba a conoce deficitnan grandi.
A kibra tendencia di crece debe
Aruba su debe externo a wordo redobla cu 2 mil miyon florin den un tempo record di 4 aña den e periodo 2010 pa 2014. E debe aki ta pone un presion grandi riba finansa publico y ta afecta economia di Aruba. Na aña 2018, Gobierno a tuma paso pa frena e crecemento di debe y asina por constata cu na aña 2019 ta logra kibra cu e tendencia di crece debe. Despues cu di aña 2014 pa 2018, Aruba su quota di debe tabata fluctua rond di 75%, na aña 2019 e quota a baha bay na 71% y di e manera aki a logra kibra e tendencia di crece e debe di nos Pais.
A cumpli cu norma nan di Protocol di november 2018
Pa sigura cu e rumbo financiero ta cambia na Aruba, a cera un protocol cu Hulanda na november 2018 den cual a stipula algun norma financiero pa deficit, debe y gasto di personal pa e añanan 2018 pa 2021. A wordo palabra pa yega na un surplus na aña 2020 di 0,5% cu ta equivalente na 25 miyon florin y na aña 2021 y despues un surplus di 1% cu ta 50 miyon florin. Aruba a logra yega na fin di aña 2019 na un surplus chikito di 3,9 miyon florin.
Pa aña 2020 a logra entrega un presupuesto cu un surplus di 46 miyon florin na Parlamento, pero e pandemia a cambia e scenario financiero. Pa e debe a stipula un bahada di e quota di debe na 70% na aña 2027 y na 50% na aña 2039. Aruba a logra yega na 71,8% na aña 2019 cual ta indicacion cu lo cumpli cu e norma aki di forma adelanta, sino tabata pa e prestamonan cu mester a wordo haci na Hulanda pa por a enfrenta y surpasa e pandemia di Covid-19.
Pa e gastonan di personal a palabra pa kibra e trend di subida di gasto di personal, reduci esaki tur aña y pa tene esaki bou di 479 miyon florin. Aruba a cumpli door di contene gasto pa por a keda bou e nivel di 479 miyon. Pues Gobierno a logra kibra e trendnan di crecemento di deficit, debe y gasto di personal y ta logra cumpli asina grandemente cu e normanan di e Protocol di november 2018.
Locual falta ta normanan financiero adapta na e realidad financiero post-pandemia
E pandemia a cambia e realidad financiero di Aruba. Na aña 2020 y 2021, Aruba a core cu deficitnan enorme debi cu entrada a cay drasticamente. Aruba mester a fia 916 miyon florin di Hulanda y esaki a pone e quota di debe bay te 127,1% na 2020 y 108% na 2021.
Gobierno a purba pa contene su gastonan y wanta mas cu por na tur palabracion di e Protocol y tambe na tur condicion cu Hulanda a impone pa por a yega na fiansa nan di Covid. Sinembargo e realidad financiero cu Covid a trece cune pa mundo y Aruba, ta exigi un adaptacion di e normanan. Keda wanta na e normanan pre-covid pa deficit, debe y gasto di personal den e tempo nos dilanti, ta hiba na resultado irealistico y ta haci daño na gobernacion y economia di Aruba. Sigur en bista di e reformanan necesario den cuadro di e palabracionnan di 'Landspakket,' keda wanta na norma pre-covid no lo duna resultado positivo pa Aruba.
Pa Aruba por keda focus den direccion di un finansa publico manehabel y sostenibel, locual cu falta ta norma financiero adapta na e realidad financiero post-pandemia. Eynan e energia di tur negosacion cu Hulanda, supervision di CAFT y e debate publico mester ta dirigi.
E pandemia por a cambia e scenario financiero di Aruba, pero e focus di Gobierno y di Minister di Finansa di Aruba pa yega na un finansa publico manehabel y sostenibel, a keda mesun cos. Cu norma financiero realistico, e trabou di mehoracion financiero por sigui na bienestar di Pais Aruba.
{gallery}E pandemia a cambia e scenario financiero di Aruba, pero e enfoke di Gobierno pa yega na un finansa publico manehabel y sostenibel a keda mesun cos{/gallery}
