FAVI tabatin su exitoso caminata “Walk for Vision”den su diesun edicion

Terapista di Rehabilitacion di FAVI Sari Wernet:

ORANJESTAD (AAN) – Sari Wernet-Kelly, Terapista di Rehabilitacion di FAVI, a duna DIARIO informacion tocante e actividad cu nan tabatin banda Coco’s Beach, Diadomingo 3 di November awo, atardi.

            Sari Wernet a menciona cu esaki tabata e di 11 edicion di nan caminata “Cana cu Vision”. Esaki ta den cuadro di celebracion di FAVI su di 50 aniversario. “Nos a introduci alavez, nos careda di ‘wowito’ cu ta pa mucha di 5 te 10 aña, y esey ta prome biaha cu nos a hacie oficialmente, y el a bay hopi bon; e meta ta pa recauda fondo pa nos fundacion, pa gastonan operacional, y tambe pa incentiva nos clientenan pa ta activo”, Sari a indica.

            Esaki ta nifica cu e fundacion por ta den comunidad y e comunidad cerca dje, cu por haci su preguntanan ya cu semper ta bon, como fundacion FAVI, bin afo, cu eventonan di e forma aki, Sari Wernet-Kelly a comenta.

            El a agrega cu e caminata “walk for di vision” ta un cu nan a cuminza na un manera simpel 13 aña pasa, pero door di Covid pa dos aña no por a organize. “Nos a cuminza cu un grupo chikito, y el a crece y atravez di añanan el a haya su popularidad, cu toch aña aden, aña afo, e mesun personanan cu ta bin atende nos caminata, ta participa. E ta un ‘fun walk & run’ pues esnan cu kier core tambe ta haya oportunidad di hacie, y e meta ta pa pasa un rato hunto”, Wernet-Kelly a señala.

            Esaki tabata un evento hopi special, e dama a expresa, pasobra el a wordo dedica na señor Eric Gomez, cu ta e boluntario cu a yuda FAVI tur e añanan, den cualkier situacion, p’asina nan por tin nan caminata.