ORANJESTAD (AAN): Diamars mainta oficialmente e di dos fase di e proyecto di Baby Beach a wordo entrega y durante un conferencia di prensa minister di Turismo Dangui Oduber
a bisa cu e ta contento cu tanto nos localnan como tambe e turistanan por bay haci uso di esaki.
“Algun aña pasa nos a anuncia un master plan pa Seroe Colorado cu tabata consisti di mehoracion y upgrading, conforme nos maneho di ministerio di Turismo pa haci inversionnan continuo den mehoracion di e producto Aruba.
E plan tabata consisti di mehoracion den e area di Baby Beach y Rodgers Beach.
Tabata na 2019 cu nos a anuncia cu nos lo ehecuta e proyecto, pero e planning a cambia por completo pa motibo entre otro di e pandemia di Coronavirus, segun Oduber.
El a sigui bisa cu e pone e proyecto den fase y awor cu fase dos ta cla, ainda falta fase tres.
Segun e minister, fase 2 ta consisti di crea espacio completamente nobo di parkeo.
“Tambe nos a pone iluminacion y landscaping, mientras cu nos a haci trabaonan pa amplia e beach di Baby Beach”.
A construi tambe un trapi nobo cu tabata banda di e tennis court.
Nos ta contento pa anuncia awe cu e destaho publico pa fase 3 ta cla pa cuminza.
Ta trata di mehoracion di e tennis courts.
E intencion ta pa tin dos cancha di tennis y dos cancha multifuncional, segun e mandatario, kende a indica cu e meta ta pa den di dos cuartal di otro aña e proyecto completo di Baby Beach keda cla, segun Oduber.
El a sigui bisa cu e destaho publico pa e proyecto di Rodgers Beach, cu tambe ta parti di e master plan, tambe ta canando.
E intencion ta pa den e prome cuartal di 2024, e proyecto keda cla.
Esey ta nifica cu pa otro aña e master plan lo keda cla y esey ta importante pa e desaroyo economico di Aruba y pa e desaroyo turistico, segun e mandatario.
.
