Exitoso evento tocante lantamento di muchanan den un mundo digital

Señora Sasha Geerman di DAS:

ORANJESTAD (AAN): Na Universidad di Aruba recientemente a tuma luga un evento exitoso riba e tema ‘Opgroeien in een Digitale Samenleving organisa pa Departamento di Asunto Social (DAS) hunto cu Marlous Tiekstra di e programa’ Social Work and Development’ y den colaboracion cu Comision Derecho di Mucha y cooperacion di Universidad di Aruba.

   Den un entrevista cu DIARIO, señora Sasha Geerman di DAS a splica cu e evento aki ta pa trata e tema di lantamento di muchanan den un mundo digital. Segun señora Geerman, ya pa hopi aña ta papia di derecho di mucha, incluyendo e tratado, pero tempo ta avansando asina lihe, y nos ta bibando den un mundo digital. Y ta importante pa salbaguardia e derechonan di mucha riba tur plataforma digital tambe. Muchanan ta riba varios di e plataformanan aki cu mayornan y profesionalnan social no conoce mes.

   Universidad di Aruba ta preparando futuro trahadornan social y ta ekipa nan pa e mundo digital cu ta avansando hopi lihe cu introduccion di Inteligencia Artificial. 

   Den e evento a participa tres orador, señor Rhomyko Winklaar di FADA, kende a comparti e novedadnan den e mundo digital, señora Clementia Eugene a elabora riba e investigacion cu el a haci riba maltrato di mucha y mundo digital, y señora Angela Persuad a elabora riba traficacion di hende, principalemente riba e plataformanan digital cu ta e medionan unda esaki ta cuminsa.

   “Nos ta wak e mundo digital hopi inofensivo, pero tin masha hopi peliger pa mucha y hoben, especialmente esnan cu a bay studia afo. Nos meta ta pa tin suficiente profesional bon prepara pa yuda contraresta e peligernan rond di e mundo digital”, señora Geerman a expresa.

   El a expresa cu e evento a bay den un ambiente hopi ameno cu profesionalnan di tur sector, entre otro, di salubridad, enseñansa, social, y di Universidad di Aruba.