Exitoso encuentro Adulto Mayor na Fundacion Famia Piedra Plat

Cu un charla di Dr. Maikel Kelly

ORANJESTAD (AAN): Den fin di siman cu a pasa, Fundacion Centro Famia Piedra Plat a organiza e ultimo  actividad pa e aña aki pa e grupo di 60+ di bario.

   A scohe pa un thanksgiving brunch combina cu un charla tocante drumimento. E charla tabata na encargo di dokter Maikel Kelly. Docter Kelly tabata docter di cas den bario di Piedra Plat. Asina dokter a topa cu algun ex-pacient.

   E charla  tabata dirigí riba e edad di esnan presente. A splica e fase nan y duracion di soño y e uso di remedi pa drumi. E cantidad di hende cu ta usa remedi a aumenta hopi ultimo añanan aki na Aruba. Pa algun e ta un addicion caba. A compartí consehonan con pa atende cu e problema aki.

   Despues a sigui un dushi brunch acompaña cu musica di antaño, unda esnan presente a continua gosa di e oportunidad pa entercambia cu otro.

   Directiva di FCFPP y e comicion encargo cu e encuentronan aki ta gradici cada uno cu a aporta. Danki na CEDE Aruba / Bario Unico y algun persona cu a duna nan aporte pa e grupo di 60+ di bario di Piedra Plat y vecindario.