Exitoso celebracion di San Juan na Tilburg

ORANJESTAD (AAN); Informacion di Hulanda, ta indica cu e organizacion ‘Nos Baranca’ na Tilburg

a tene un merdia familiar na unda tabata tin un combinacion di hersengymnastiek y celebracion di San Juan/Dera Gai.

  Na e hersengymnastiek a partici shete ekipo na unda un ekipo di Kabinete di Aruba bao di e nomber Cabes duro di Den Haag tambe a participa. Despues di 61 pregunta den diferente categoria, e ekipo Jolly Pirates a bay cu e Prome premio, sigui pa Biba Dushi na di dos lugar y e ekipo di Breindhoven na di tercer lugar.

   E di dos parti di e merdia tabata den cuadro di e fiesta di San Juan. Maria Ridderstaat a habri e programa cu canto di nos himno nacional ‘Aruba Dushi Tera’. PR di Gabinete di Aruba Sidney Kock a tene un discurso cortico unda el a disculpa Minister Plenipotenciario Ady Thijsen cu debi di ta sufri un quebrante di salud no por tabata presente, pero si ta apoya e initiativa di Nos Baranca pa despues di Covid, a organiza un fiesta di San Juan y asina tene nos cultura na bida na Hulanda. Sr. Kock a bisa cu esaki ta e momentonan cu Arubianonan ta bin hunto pa celebra, aprecia y cultiva nos cultura y a bisa cu spera cu na final di aña aki tambe lo tin un Festival di Dande na Hulanda, cu ta un otro expresion bunita y unico di cultura di Aruba.

   Despues e publico a sigui gosa bou guia di Luis Figaroa di e fiesta di San Juan, cu canto, baile, rancamento di bandera y matamento di e gay.

   E ganador di e cancion di San Juan a resulta Jeff Ridderstaat. Den e competencia di baile e pareha ganador tabata Maria Ridderstaat y Jorge Ridderstaat.

   Cattaleya Silvania a gana pa e wega di Ranka Bandera, mientras cu Christerson Dirksz a bay cu e premio pa e wega di Mat’e Gay.  E potretnan ta cortesia di Arubahuis.