ORANJESTAD (AAN): Recientemente Bureau Onderwijs Kwaliteit & Examinering (O.K.E.) di E.P.B. a
tene un reunion cu e Examen Bureau di E.P.I. Durante e reunion aki e representantenan di Bureau O.K.E. a comparti nan experencia y experticio obteni. Primordialmente a elabora riba por ehempel con pa mantene e calidad y integridad di examen; proceso di certificacion (diplomering) y tur e criterianan di evaluacion.
Banda di tur esaki a comparti tambe riba diferente strategia con lo por mehora esakinan.
E tabata un mainta yena cu informacion unda cu E.P.I. por a haya un bista cla di cua ta tur e documentonan necesario pa un ‘examendossier’ wordo compila. Tur esakinan ta rekisitonan pa por garantisa otorgamento di diploma na un manera responsabel.
Bureau O.K.E. tin tres aña den funcion y su meta principal ta pa mehora e calidad di enseñansa brinda na E.P.B. E meta di e curiculo nobo ta basa riba eleva e standardnan di enseñansa riba nivel internacional.
Den e cuadro di e liña di siñamento continuo ‘doorlopende leerlijn’ entre e dos scolnan tabata di sumo importancia pa E.P.I. haci un bishita cerca Bureau O.K.E. Esaki mirando cu aña 2024 E.P.B. a otorga su prome diploma den e “opleidingnan” ABO 2 cu ta ekivalente na un diploma na nivel di M.B.O. nivel 2. Mester remarca cu e diploma aki ta e mesun nivel cu e diploma di un M.B.O. nivel 2 di Hulanda. Esaki sigur ta un logro grandi pa enseñansa y Aruba en general.
Scolnan di E.P.B. ta desea E.P.I. tur clase di exito cu e desafionan nan dilanti. Nos ta spera cu e documentonan comparti por yuda duna structura. Por ultimo E.P.B. kier a recorda cu semper nan lo ta disponibel pa yuda duna sosten y guia pa e tarea grandi cu E.P.I. tin nan dilanti.
