Ex-Park Ranger a bay yuda grupo di Scout den Parke Arikok

ORANJESTAD (AAN): Tabata Diabierna cu a pasa, cu e Hopman di e organizacion dinamico Grupo Scout Casibari a haye ta pidi e conocido Salvador Franken pa un yudanza,

pa asina por tene un caminata cu e Scoutnan den naturaleza di parke.

   Ex-Park Ranger Franken a bay di acuerdo cu esey, y semper e ta duna man na mucha- y hobennan.

   Segun a ser splica na DIARIO, e grupo a haya un fabuloso caminata, acompaña cu splicacion amplio di tur e area cu nan a cana, incluyendo detaye di e flora y fauna.

   Nan a cana un ruta di como 8 kilometer, y esaki a dura como 2 ora y mey.

   E grupo a keda hopi contento mes.  Na final Hopman a expresa su gratitud pa e cooperacion ricibi, y e muchanan tambe a bise con fabuloso e caminata tabata, y di tur loke nan a siña.

   Salvador Franken na su turno a bisa cu semper su lema ta cu muchanan ta bin na prome lugar, y pesey e ta cancela cualkier cita cu e tabatin planea, y prefera di duna un man y yuda mucha- y hobennan haya sa mas di e naturaleza di Aruba.