Ex-Minister Plenipotenciario Guillfred Besaril a keda deteni

Relaciona cu iregularidadnan na Arubahuis

• Investigacion conoci como ‘Caso Tulipan’
• El a haya retiro y awor ta bao investigacion 

ORANJESTAD (AAN):  Ministerio Publico a duna di conoce cu Landsrecherche a detene diamars den e investigacion di e caso Tulipan e homber cu inicialnan G.F.B., kende tur hende sa ta Guillfred Fransis Besaril.

   E investigacion Tulipan ta dirigi su mes riba iregularidadnan na Arubahuis den e periodo di 2018 te 2021.

   Esey a socede durante cu Besaril tabata den funcion di minister plenipotenciario di Aruba na Hulanda.

   Caso Besaril: Den luna di october, 2023 Hues di Casonan di Empleadonan di Gobierno (Ambtenarenzaken) a dicta sentencia den e protesta di Guillfred Besaril contra e decision di Gobernador di duna Besaril retiro como castigo disciplinario.

   Hues den su evaluacion ta haya cu tin tur indicacion cu Besaril den su periodo como Ministro Plenipotenciario no a cumpli cu su deber.

   Ta asina cu 9 Januari 2023, den un Decreto di Gobierno, Gobernador ta informa Besaril cu ta uza articulo 95 di “Landsverordening ambtenarenrecht (La) pa duna e castigo disciplinario cu ta su retiro. Besaril, dia 23 Januari 2023 a bay den protesta di esaki y asina a cuminsa e caso.

   Diesocho acusacion contra Besaril: Hues den su evaluacion di e caso a mustra cu e motibo di duna retiro, Gobierno ta mustra cu Besaril a faya hopi den cumpli cu su deber como Minister Plenipotenciario. Nan a presenta 18 acusacion contra Besaril:

(*) A duna ordennan di pago caminda e ta beneficia su mes.

(*) A haci gastonan sin tin di haci cu su funcion, a costo di Gobierno.

(*) A haci un control di factura hopi malo.

   Gasta placa di gobierno durante viahenan priva:  Segun e investigacion, e datonan aki a bin dilanti:

(*) Durante 14 December 2020 te cu 4 Januari 2021 a malgasta placa di Gobierno.

(*) A abusa di su funcion door di duna informacion pa su probecho personal y a paga Divi Village.

(*) Riba 9 April 2021 y den e periodo di 17 Mei 2021 te cu 21 September 2021, a malgasta placa di Gobierno.

(*) Pa interes personal a cumpra servicio di Elever Strategy and Solution sin cu el a haya un aprobacion pa esaki.

(*) A haci uso di servicio VIP na Schiphol pa viahenan priva y vacacion.

(*) A declara gastonan di cual un parti tabatin interesnan priva.

   Malusa placa di gobierno durante viahe di trabao:

(*) A laga su mes haya dobble pago di gasto pa viahenan di trabao, door di tabata usa e pinpas di Gobierno ora di come na lugarnan, siendo cu e ta haya placa pa gasta caba y placa pa representacion.

(*) A regla servicio VIP pa su famia di Schiphol riba gastonan di Gobierno.

   Gasta placa di mas como Minister Plenipotenciario:

(*) Den e periodo di 2018 te cu 2021, den forma ineficiente a gasta placanan di Gobierno pa cambia cellularnan cada pasa 2 aña.

(*) Sin cu e tabatin permiso, a haci gastonan cu en realidad ta pa uso priva. Na 2018 a cumpra muebles pa cas.

(*) Na 2021 a declara factura di compra di muebles pa baby pa asina e haya e placa back.

(*) Desde Mei 2019, via administracion di creditornan a laga restitui placanan di prima di salubridad pa su señora.

(*) A desvia di e proceduranan normal cu ta uza ora ta haci un contract di huur.

(*) No a mantene su mes na e procedimentonan pa busca ofertanan pa instalacion di alarma na e cas cu e tabata huur.

(*) A haci gastonan grandi y innecesario na renovacion di e cas di huur.

   Di parti di Gobierno a worde mustra cu Besaril a abusa di su funcion y autoridad como Ministerio Plenipotenciario pa beneficia su mes financieramente. Gobierno ta haya cu Besaril a demostra cu e no ta sirbi pa e funcion ey y pa bolbe bay traha como Polis no ta posibel.

   Di su banda, Guillfred Besaril a desmenti cu e ta culpabel di tur e acusacionnan cu Gobierno a presenta.

   Solamente 4 acusacion proba: Hues den su evaluacion di e caso, a pasa riba tur e acusacionnan. Hues den mayoria di e acusacionnan, ta haya cu Besaril no ta culpabel di keda sin cumpli cu su deber.

   Hues a haya cu e acusacionnan ariba menciona bao di e letternan D., E., I. y O. si ta proba cu Besaril a faya hopi den cumplimento di su deber y cu esaki ta hustifica e medida disciplinario pa kita Besaril for di trabao.

   Cu e detencion di diamars. awo ta pendiente di mas informacion y kico lo sali afo for di e caso aki.