ORANJESTAD (AAN) – Eva Wever, encarga cu Arubiano Local Brand, a gradici e director di Santa Rosa y na Minister Ursell Arends pa nan confianza poni den e compania aki y su producto, cu ta e saco degradable y reusable.
Wever a bisa cu manera mayoria di hende sa Arubiano ta esun prome cu a produci saconan biodegradable y reusable y cu no ta bira desperdicio manera plastico ni otro material toxico.
E dama a comenta cu nan a mira e necesidad di uni cu agricultura, no solamente pa yuda nan elimina plastico cu ta hopi dañino pa nos medio ambiente, y nos propio salud, pero tambe pa haci concientizacion.
“Cu concientizacion nos kiermen pa bira parti di nos bida esencia, produci na nos isla cu planta awe pa cosecha mañan, ta algo necesario.
Arubiano Local Brand ta un compania cu ta existi pa mas di cinco aña. Nos ta conoci pa saca potretnan autentico na Aruba mes, di nos pahranan endemico, locual nos ta promove pa cuida nan, proteha nos naturaleza, nos medio ambiente, Bubali Plas y nos matanan local”, Wever a señala.
El a subraya cu aworaki e compania ta contento y hopi gradici na Santa Rosa, pa wak e importancia cu e concientizacion aki tambe ta bon pa nos cunukeronan, nos muchanan, nos comunidad…
“E ta un saco bunita cu ta mustra y promove e necesidad pa agricultura, kiermen, bo ta siña di dje, den bo cas, den bo hogar, y nan ta bay wak cu bo ta cu un saco duradero y reusable. Cada bez cu bo ta bin cumpra bo producto na Santa Rosa, bo ta hinke den e saco y bay cas cu cune. No tin miho manera pa promove agricultura y e cuido di medio ambiente, cu un saco reusable y biodegradable”, Eva Wever di Arubiano Local Brand a conclui.
