Estudio lo revela con fuerte DIP ta contra influencia y intentonan di corupcion

Prome Minister a reuni cu señora Simone van der Zee

ORANJESTAD (AAN):  Diaranson ultimo, Prome Minister Evelyn Wever-Croes a reuni cu señora Simone van der Zee kende ta encarga cu un estudio (“weerbaarheidsonderzoek”) pa resiliencia na diferente departamento di Gobierno.

            Bou di peticion di Prome Minister, señora van der Zee a haci e estudio aki tambe den Departamento di Infrastructura y Planificacion (DIP) pa haya sa con fuerte y resiliente DIP ta contra influencia y intentonan di corupcion di awo y pa den futuro.

            Manera conoci, e departamento aki a sufri hopi bou di corupcion di mandatarionan di pasado. Ministernan di Infrastructura prome cu Prome Minister Everlyn Wever-Croes, a haya nan involucra cu husticia pa motibo di nan maneho. Y algun investigacion hopi serio a wordo produci cu a manca e departamento. E ministernan envolvi tawata mas preocupa pa yuda nan amigonan cu atende cu e retonan di e departamento haciendo e departamento hopi swak.

            Desde cu Prome Minister actual a tuma over, e ta trahando pa haci e departamento DIP uno fuerte y resiliente pa asina e departamento no por tin influencia mas ni di politica tampoco di actonan di corupcion. 

            Prome Minister a duna di conoce cu Señora Simone van der Zee a traha e rapport y tawata tin hopi bon cooperacion di henter e team di empleado di DIP. Diferente conbersacionnan a tuma luga den e departamento. Señora van der Zee tambe ta conclui cu e heridanan ta grandi den e departamento, resultado di e mal maneho di e ministernan anterior, pero ta ripara cu awo tin animo y speransa cu aworaki si cosnan ta bay ta miho.

            Prome Minister a enfatisa cu ta importante pa cu na Aruba no tin influencia di criminalidad transnacional pa motibo cu ta conoci cu real estate entre paisnan tambe sa tin criminalidad cu ta tuma luga.

            E investigacion ta yegando su final y na januari lo haya e prome rapport cu recomendacionnan con pa sigui y cua pasonan mester tuma pa haci DIP un departamento fuerte y resiliente. Hunto cu trabounan di reorganisacion y reconstruccion di e departamento, cu tambe lo bay cuminsa, e recomendacionnan aki ta e yabi pa DIP ta exitoso den futuro. 

            Ainda tin miles di persona cu ta wardando contesta riba nan peticionnan y esaki ta hopi lamentable y resultado di e mal maneho den e departamento di e ministernan anterior di infrastructura. Desde cu Evelyn Wever-Croes a tuma departamento over, el a delega e autoridad pa firma na e Director, kibrando asina e influencia politico den DIP. Y awo, ta haciendo tur su esfuerso pa yuda DIP elimina tur su atrasonan pa cada ciudadano cu ta wardando haya nan contesta.

            “Aña 2024 ta priminti di bira un aña hopi exitoso pa DIP caminda cu porfin lo trata peticionnan di esnan cu ta wardando. DIP e ora tambe por cuminsa traha mas den actualidad y lo no tin influencia mas di corupcion”, Prome Minister a enfatisa.