Entrante awe lo cera parti di Wilhelminastraat pa 30 dia largo

Fase 2 di revitalizacion a cuminsa

ORANJESTAD (AAN): Fase 2 di proyecto Revitalisacion di Wilhelminastraat lo cuminza awe Diaranson, 10 di April 2024.  Esey ta loke Elisa Chieh Chen Lake di DOW a declara den un entrevista.

   Entrante 9:00 am, y pa un periodo di 30 dia, Wilhelminastraat na Playa lo wordo cera pa asina DOW sigui cu Fase 2 di e revitalizacion di e area.

   E area cu lo cera lo ta for di e zona di “Taste My Aruba” (cu ta e T-weg net pabao di loke tabata antes Brenchie’s Hardware) bay pabao te na Mario’s Sportshop.  Lo bay kita e asfalt di e caminda, y haci’e completamente di klinker.

   Segun e funcionario di DOW, lo bay tin lugar pa staciona auto tambe den e parti aki di Fase 2.

   Esaki nifica cu pa 30 dia largo, e caminda aki lo ta cera, incluyendo fin di siman.  Ruta di desviacion lo ser indica cu borchi y baricada di aviso.

   E trabao lo bay mas rapido compara cu e otro area di Wilhelminastraat, como cu aki ta djis raspa y kita e asfalt y pone klinker na su lugar.

   Cambionan di ruta di desviacion lo tin di bay awor via Ooststraat y tambe Irenestraat.  Automobilistanan ta ser pidi pa tene bon cuenta cu e cambionan aki.