ORANJESTAD (AAN): Diamars mainta, Sindicato STA a reuni cu miembro y no-miembronan di NV Elmar pa splica con ta bayendo cu e negociacionnan pa cu e CAO nobo.
A bisa cu tin 2 opcion, sea uno di 3 aña of uno di 4 aña. A splica nan e diferencia di nan.
Miembronan a bin cu proposicion y cambionan cu nan lo kier mira si acaso bay pa e 4 aña di CAO.
Segun Diego de Cuba di Sindicato STA, e reunion a bay den bon ambiente, empleadonan a compronde e esencia di e reunion, y pesey tabatin hopi pregunta. Un punto cu a resalta den e negociacion ta e intencion cu STA a bin cune hunto cu gerencia di NV Elmar, pa bin cu un Spaarplan pa Empleadonan. Mayoria di trahadornan a haya e intencion bon, y a bay di acuerdo cu esey, pues di crea un Spaarfonds. Esey lo bay informa gerencia di e aprobacion.
E duracion di e contrato colectivo, e bashi-premie, e prima riba e ganashi, tur esey a wordo discuti, dianan extra di vacacion, placa pa yiu, ora di overtime, voucher pa cuminda. Tur esey lo bay conoce aumento, pero unico diferencia ta si ta bay un CAO di 3 of di 4 aña. Lo bay pa un CAO di 4 aña si acaso trahadornan bay di acuerdo cune.
