Emocionante ceremonia di graduacion di Educacion Profesional Basico (E.P.B.) Sector Economia

A otorga diploma na un total di 68 graduado

ORANJESTAD (AAN): Dialuna ultimo, den e ballroom di E.P.B. Oranjestad a tuma luga Ceremonia di Graduacion di e alumnonan di sector Economia.  Minister Endy Croes acompaña pa esposa Dilailah Croes – Odor tabata presente pa celebra e logro aki cu e 68 graduadonan.

            A inicia e ceremonia oficial cu himno di Aruba canta pa e docentenan di e scol. Durante e ocasion special aki, director di E.P.B. Sr. Erwin Lopez a hiba palabra.

            Despues Minister Endy Croes a dirigi palabra na e graduadonan, felicitando nan pa nan esfuerso, perseverancia, dedicacion y determinacion cu a duna su fruto y awe nan a obtene nan diploma.

            Minister di Enseñansa a indica cu den bida nos perde hopi cos, pero e diploma y e conocemento cu bo ta adkiri durante bo estudio ta pa semper. Alabes a encurasha e studiantenan pa sigui studia. Tambe, e mandatario di Enseñansa a papia tocante e importancia pa aplica e 4-D nan pa ta exitoso, cual ta deseo, disciplina, dedicacion y determinacion.

            E miho graduado di E.P.B. sector Economia:

ABS2D:   Dianne - Ezzard Solognier

C4A1:      Anaïs Helder

A4U1:     Nicolaas Madrigal – Ocampo

A 4D1:    Shaylee Tromp

            Den nomber di Gobierno di Aruba, Minister Endy Croes a felicita e graduadonan. Alabes, Minister Endy Croes ta gradici directiva di S.E.P.B, director Sr. Erwin Lopez, staf, mentor, docente- y mayornan cu a contribui den e logro di e graduadonan y desea tur graduado hopi exito den nan futuro.