ORANJESTAD (AAN): Informacion for di Den Haag ta indica cu recientemente e embahador nobo di Alemania pa Reino Hulandes,
Nikolaus Meyer-Landrut a haci un bishita di cortesia na Minister Plenipotenciario demisionario mr. Ady Thijsen.
Na prome instante e motibo di su bishita ta pa cera conoci cu e representante di Aruba como embahador Aleman nobo staciona na Den Haag. Tambe embahador Meyer-Landrut a anuncia cu su persona tin plan pa bishita Aruba den cuadro cu e ta embahador pa henter Reino Hulandes.
Minister Thijsen a haci uso di e bishita pa informa embahador Meyer-Landrut riba e ultimo desaroyonan na Aruba y a bisa cu spera cu su bishita na Aruba lo ta exitoso pa cu e relacion entre Alemania y Aruba. Y cu esaki tambe ta conta pa e relacion entre Gabinete di Aruba y embahada di Alemania na Hulanda como parti di e vision pa busca mas cooperacion entre Gabinete di Aruba y embahadanan. E potret ta cortesia di Arubahuis.
