Elmar su open dag a mustra compromiso na comunidad

Pueblo a mira tur invocacion den distribucion di energia

ORANJESTAD (AAN): E compania NV Elmar a habri su porta Diasabra pa comunidad acudi na un Open Dag memorabel. E evento cu na forma boluntario a ser organisa door di empleadonan, a marca un ocasion importante unda e compania a mustra su trabao. E Open Dag ta un compromiso di Elmar pa envolucra e comunidad Arubano.  Tur bishitante tabatin e oportunidad unico pa interactua cu e Team di Elmar, haci preguntanan, haya conocimento tocante consumo di energia, distribucion di coriente y practicanan di seguridad. Un danki di curazon ta bay na tur e mayornan cu a trece nan yiu pa participa den e experiencia educativo aki.

   Un di e momentonan cu a sobresali durante e evento tabata e booth di demostracion di Meter & Connections, unda bishitantenan a keda asombra di descubri e gran diferencia den uzo di energia entre aparatonan di uzo diario. Nan a presencia e comparacion entre e consumo di un blow dryer (13 ampere) y e uzo minimal di un luz LED (1-2 ampere). Mediante e smart meters di Elmar a laga e bishitante ta mas consciente tocante nan habitonan di consumo di energia.

   Un otro momento memorabel a tuma luga na e booth di demostracion di Overhead Lines, unda lineman di Elmar a participa den un competencia di subi pole di coriente, mustrando nan experiencia den e metodo tradicional uzando harnas y spoor pa sibi y colga na e palo di coriente.

   E booth di demostracion di Underground Cables y Grid Quality Management a duna demostracion di un kabelstoring y un bista di e consecuencianan cu un kabel por sufri door di causa tercero. Por ehempel ora un persona dal un kabel cu piek cu no a causa interupcion inmediato, pero si daño na e kabel unda cu despues di tempo door di awacero y vocht cu a drenta kabel na e area afecta a causa un kabelstoring.

   Un tributo special a worde dedica na "100 Aña di Distribucion di Energia na Aruba" atraves di un exhibicion pa sr Steve Francees, detayando e trayecto historico di distribucion di energia riba nos isla. E exhibicion informativo aki a conmemora e evolucion y progreso di distribucion di energia na Aruba.

   "Nos ta sumamente agradecido na nos empleadonan, colaboradornan, mayornan y comunidad pa nan apoyo y participacion den haci nos Open Dag un experiencia notabel. Ta un privilegio pa nos sirbi e comunidad Arubano y eventonan manera esaki ta subraya nos compromiso pa transparencia, educacion y innovacion den distribucion di energia," Anthony Irausquin, Director di Elmar a vocefera.

   Elmar ta yama un danki na tur persona cu di un of otro forma a contribui na e relansamento di e Open Dag di Elmar. Nos ta desea di extende un danki especial na e comitee organizador cu a traha duro pa organiza e Open Dag, nan esfuersonan ta worde aprecia grandemente pa nan dedicacion. Elmar lo continua cu e iniciativa aki den futuro, esaki ta e prome paso pa continua cu mas Open Dag pa sigui envolucra e comunidad Arubano y duna tur bishitante e oportunidad unico pa interactua cu e Team di Elmar.