Elmar a duna presentacion na Golden Age Expo tocante con pa optimalisa bo cas pa spaar mas coriente

ORANJESTAD (AAN): Pa di tres aña consecutivo, NV Elmar a forma parti di Golden Age Expo, e aña aki na Club Kibrahacha,

unda nan a sigui fortalece nos conexion cu e comunidad di adultonan mayor.

   Recientemente, Elmar a lansa su serie di presentacionnan “Workshop Cas • Coriente • Consciente” durante su ultimo Contacto cu Bario na Savaneta, como parti di e sesion informativo anual. Na Golden Age Expo, Elmar a sigui cu e serie, bao di e lema “Hunto nos ta Spaar!”, cu enfoke riba con por uza coriente di un manera mas consciente y eficiente den cas.

   Durante e presentacion, Elmar a comparti diferente conseho practico cu por yuda reduci consumo di coriente. Entre otro, nan a enfoca riba uzo eficiente di airco, incluyendo importancia di isolacion adecua di e cas, sigura cu e capacidad di BTU ta adecuado pa e espacio y mantene e temperatura di e airco den e rango recomenda.

   Cu “Workshop Cas • Coriente • Consciente”, Elmar kier comparti informacion practico y accesibel cu por yuda nos comunidad haci escogencian mas consciente den nan uzo diario di coriente y optimalisa nan cas pa uza menos coriente.

   Elmar tambe tabata presente cu su booth durante e evento, unda nan team a interactua cu e participantenan, contesta preguntanan, scucha nan feedback y comparti informacion tocante nan diferente servicio y facilidadnan.

   Nan ta gradici e organizadornan di Golden Age Expo pa e invitacion y pa e oportunidad pa, pa di tres aña consecutivo, por forma parti di un evento cu ta crea un espacio balioso pa informa, conecta y comparti conocemento cu nos adultonan mayor.  “Hunto nos ta Spaar”.