Eleccion di Diadomingo por a duna Suriname su prome president femenino

ORANJESTAD (AAN): Pueblo di Suriname a acudi Diadomingo pa urnanan electoral, na un pais unda ta pasando mey-mey di problemanan constant cu economia,

incertidumbre politico, y un chens unico pa reformula e actitud regional riba genero y liderato, cu e chens cu e pais por lanta awe Dialuna cu nan prome hefe femenino di estado.

   Un total di 399.932 persona cu derecho di voto, tabatin di 7:00 am te cu 7:00 pm chens di bay vota ayera.  Te na ciere di edicion aki, no por a determina kende a gana eleccion.

   Mirando e tradicion di Partido NDP (Nationale Democratische Partij) di nomina nan lider, Jennifer Geerlings-Simons, e ta awor perfilando como e candidata presidencial cu mas chens, si acaso nan partido logra lidera un coalicion.

   E competencia ta mustra di ta bay ta entre e dos partidonan politico dominante di Suriname, esta Partido NDP y Partido VHP (Vooruitstrevende Hervormings Partij), cu segun ultimo encuestanan, tin chens grandi cu ningun di dos lo bay saca mayoria absoluto, pues lo tin di bay negocia un coalicion despues di votamento.  Partido NDP ta conoci tambe como esun den cual defunto Desi Bouterse tabata lidera.

   Jenny Geerlings-Simons a presenta un vision audaz pa reforma economico di Suriname, centraliza riba e reduccion di desigualdad y fortalecimento di sectornan manera educacion, salud, infrastructura, produccion, y turismo.  El a bisa cada biaha cu economia tin di sirbi pueblo, y no e contrario.  Pues e ta rechazando e modelonan economico di elite.

   Di su banda, e dama Krishna Mathoera, ex-Comisario di Polis y actual Ministro di Defensa, kende tambe a divulga claramente su ambicion presidencial, a bin cu un perfil diferente.  Su carera politico na Suriname ta draai mas di un decada caba, y e tin experiencia ehecutivo y experiencia den mundo hudicial, y su caminda pa Presidencia ta mas pisa.

   Mathoera ta competi den realidad cu e president di Suriname, esta Chandrikapersad Santokhi, kende ta lider di Partido VHP, kende tin di gana prome den e eleccion interno prome cu e yega na e escena nacional.  Su plataforma ta centraliza riba transparencia y gobernacion etico, pero su puesto den e actual Gobierno a ricibi monton di critica.

   Finalmente, di un di e dos muhenan yega na Presidencia, lo depende di e cantidad di asientonan di e coalicion.  E partido cu logra un mayoria lo bay tin e poder di nomina e siguiente President.

   Bao e sistema electoral indirecto di Suriname, e President ta wordo eligi pa Asamblea Nacional di 51 miembro cu un mayoria di 2/3 parti.  Si e no ta asina, e proceso ta pasa pa Asamblea Popular Uni, cu ta conta cu mas di 900 miembro y aki djis mester di un mayoria simpel.