Ehecutivonan di Marriott Aruba a participa den foro pa enfoca con pa balansa salud mental mihor

ORANJESTAD (AAN): E siman aki Aruba Marriott Resort & Stellaris Casino a invita empleadanan den posicion ehecutivo, pa un foro cu a haya e nomber di "Women Let's Talk".

E evento a conta cu mas of menos 75 participante for di  compleho Marriott Resort y tambe cu nan coleganan di The Ritz-Carlton, Aruba y Costa Del Sol Development. Hunto a enfoca durante algun ora di foro riba salud mental.

   Como cu e luna aki Marriot International ta enfoca riba e tema ey na nivel mundial, Aruba Marriott Resort & Stellaris Casino siendo e hotel mas grandi di Aruba ta consciente di e retonan cu salud mental ta trece cu ne, a opta pa uza e mesun tema aki entre su coleganan femenino.

   Ruthline Theysen, Complex Director Human Resources pa Aruba Marriott Resort & Stellaris Casino, Aruba Ocean Club y Aruba Surf Club a splica cu e ekipo di recurso humano a base regular ta organiza evento pa e empleadonan. E sesion special aki di hende muhe ta parti di nan programa anual, pa cual e biaha aki a enfoca riba un tema cu ta masha sensitivo pero cu como compania ta atende cu ne a base diario.

   Marriott ta entre e poco companianan na Aruba cu ta cubri tur gasto di tratamento psicologico priva, tanto pa e empleado como su famia. Y e ultimo aña aki, a nota un aumento drastico di tratamento, probablemente debi na e diferente retonan cu e pandemia a trece cu ne.

   Y manera cu varios orador a trece padilanti, ser hende muhe den posicion ehecutivo ta haci bo creativo den con pa balansa bo mes, bo trabao, bo bida priva y bo cas, incluyendo famia, etc. Pero asina mes e mayoria a logra mantene nan salud mental y cu e foro aki a comparti algun storia di exito den con pa tin un bon balansa y pa sa ki ora ta momento pa pidi ayudo profesional. 

   Meta di e evento tabata pa inspira lidernan femenino cu nan por logra tur nan metanan poni nan dilanti, si nan por mantene un bon balansa di salud mental. Na final di e foro, ta intencion pa e participantenan a haya suficiente guia, informacion y storianan di exito den con pa maneha stress den un forma saludabel, specialmente pasobra nos ta sigui nabega memey den un ambiente di pandemia.

   E oradornan a haci tur nan esfuerso pa duna guia na tur e participantenan den con pa mustra forsa y resistencia, den momentonan duro y di presion. Y como cu tur esunnan atendiendo e foro den sala ta ehecutivonan den e industria hotelero, a elabora bastante tambe den con pa mantene un balansa entre bienestar personal y trabao. Hopi biaha trabao por bin cu un presion enorme, debi na tanto cos di haci den tempo cortico, pero ora sali di trabao ainda mester atende cu tur e demas tareanan na cas. E oradornan a haci un tremendo trabao den conta con nan ta maneha e dos areanan aki den balans.

   E oradornan durante e evento tabata minister-president di Aruba, mr. Evelyn Wever-Croes, cu tabatin un discurso masha elocuente den con a y ta manehando e pandemia, banda di tur otro responsabilidad ehecutivo y personal, siendo casa, mama y wela. Otro orado tabata minister di finansa y cultura, mr. Xiomara Maduro, cu den su rol a elabora riba otro aspectonan cu e pandemia a bin cu ne, den cual como hende muhe mester a demostra lo miho di su mes. A sigui e CEO di Aruba Tourism Authority, Ronella Croes, cu a comparti cu tur presente su mesun formula di balansa carera profesional y bida personal. E ta kere cu tin un conotacion directo entre salud fisico y salud mental, pa cual mester sigui move y mantene curpa activo pa e mente tambe por sigui funciona como debe ser.

   A sigui despues di esey un discusion di un grupo di panelistanan, dirigi pa e maestro di ceremonia, cu tabata Larissa Bermudez. A interaccion cu e panelistanan y e publico a produci varios pregunta cu a conduci na contestanan masha interesante y inspirativo.

   Anneliesse Cooper, e 'Senior Area Director HR – Caribbean & Luxury Portfolio Latin America' di Marriott tabata na Aruba specialmente pa dirigi su mes na e asociadonan di Marriott. Antoinette van den Berg, un Arubiano den posicion clave cu e compania, siendo e 'VP Sales & Distribution, Operations – Caribbean & Latin America' di Marriott International no a keda for di e lista di oradornan cu a comparti nan storia di exito. Finalmente Louella Brezovar, igualmente un local, 'Hotel Manager – The Ritz-Carlton, Aruba a entretene participantenan cu varios tip interesante den su experiencia na trabao den con pa maneha cu salud mental.