Proyectonan Quanten y Eagle LNG ta keda parti di e economia nobo - Aruba den un situacion preferencial den e era di cambio mundial - Demanda di gas y refineria limpi ta duna Aruba base regional unico
ORANJESTAD(AAN)- “E concepto di union di companianan ta loke a conduci na e logronan mundial industrial y comercial na Siglo 20. Conglomeracion a haci nan entrada. Un consortium ta un union di inversionista den un compania cu ta mara na regla sigur na Merca cu ta mara su companianan na exigencia grandi.”
Kico lo pasa cu economia di Aruba? Esaki ta e pregunta basico cu formacion di un gobierno mester contesta.
Manera DIARIO algun tempo pasa a trece dilanti, pa su actividadnan Eagle LNG na Merca mester a duna prueba di su solidez como compania Mericano.
Na e ocasion aki a bini dilanti, con importante gas natural ta actualmente den Region di Caribe, cu mas y mas ta dicidi pa gas natural como combustibel.
E situacion di Covid-19 a hinca mundo den un situacion unico den cual Aruba ta ocupa un situacion unico.
Na e momentonan aki tur pais na mundo ta den e careda pa atende cu nan economia cu ta base di bienestar di paisnan democratico cu pa medio di economia ta duna trahadonan trabou y ta percura pa comercio local.
Aruba na 2020 a registra dos logra grandi cu sigur ta e posibilidad pa Quanten trece un refineria a base di normanan nobo pa refineria Aruba y un compania cu ta distribui gas y cu ta haci Aruba su centro den Caribe.
DIARIO a investiga e negoshi di gas den Caribe y e cantidad enorme di interes cu tin cerca islanan cu mester conoce un recuperacion despues di Covid-19.
Tin informacion directo di un compania Canades por ehempel cu kier hiba e negoshi pa distribui gas pa Isla Ariba.
Informacion nobo cu DIARIO a ricibi ta indica cu e negociacionnan entre Aruba y Quanten y Eagle LNG a continua y cu e momento a acerca cu palabracionnan concreto ta wordo haci.
Pa loke ta trata Eagle DIARIO a mustra pakico e proyecto di gas a tranca.
Pa loke ta trata Quanten DIARIO a ricibi informacion cu e interes pa trece un refineria moderno Aruba ta continua.
Ta wordo mustra na DIARIO cu un economia nobo solido mester ta base di un gobierno nobo cu banda di turismo mester di proyectonan na forma urgente pa diversifica y asina crea actividad economico cu lo genera trabou cu ta produci placa pa e Arubiano y Aruba mes.
“Esaki ta e momento pa e proyectonan cu a wordo presenta na Aruba na final di 2020 y cu tin sosten di personanan importante,” informantenan a indica.
Sigur nan ta mustra riba e hecho cu Quanten ta conta cu sosten di Gobierno Mericano y den esaki ta papia directamente di e sigur e miembro di Gobierno John Kerry, cu tin un esposo biyonario propietario di e compania internacional Heinz.
Informantenan a afirma cu Aruba ta den un posicion di ventaha enorme den un mundo na careda. E realidad economico mundial ta, cu cantidad di paisnan mester amplia nan base economico debi na e debenan enorme cu paisnan democratico mester a haci pa cumpli cu debernan durante e pandemia.
Pa paisnan den desaroyo manera Aruba, buskeda di stabilidad ta esencial pa por yega na crecemento pero tambe pa por yega na un orden fiscal nobo, den cual un base mas hancho di economia ta percura pa un entrada solido cu mester por ta base pa e futuro di e generacion nobo di profesionalnan cu ta sigui crece na cantidad y mester haya un luga den mundo a base di resultado economico.
