E tema di 'SCAM' ta un problema mundial y ta birando masha serio mes

Ruth Lindor, Analista strategico den seguridad

ORANJESTAD (AAN):  Un tema hopi den tendencia mundial y cu tambe ta afecta Aruba ta esun di fraudenan pa medio di internet, mihor conoci como 'SCAM'.

            Riba esaki, Ruthlyn Lindor, Senior Strategisch Analist Nationaal di Centraal Bureau Terrorismebestrijding Veiligheid en Interpol ta splica kico ta pasando cu e tema di SCAM cu ta un problema mundial.

            El a cuminsa bisando cu esaki ta algo cu mundialmente ta birando masha serio mes pasobra ta wak cu aworaki hopi di e companianan mes ta keda saca advertencianan pasobra no tin nada mas cu por haci pa stop'e.

            A agrega cu esaki ta birando manera un tsunami of un avalancha cu ta biniendo pasobra hopi atake ta sosode tur caminda y e unico cos cu por haci ta preveni y ta hopi consciente riba con ta anda cu bo 'devices', con bo ta 'click' riba 'links'.

            Aworaki ta sacando leynan pa proveedornan di cierto servicionan pa ora di haci un campaña pa indica tur e prevencion cu mester tin y pa informa pa nan no cay den estafanan. Tin criminalnan cibernetico cu ta traha un 'fake page' pa purba estafa clientenan di algun  compania of institucion. Esaki tambe ta sosode pa medio di telefon unda ta 'broadcast' mensahenan cu ta bay rond cu informacion 'fake' di e compania locual ta pone cu hopi hende ta cay den trampa.

            Esaki ta algo cu aworaki no sa con pa ataca sino ta pa medio di preveni y purba di ta hopi conciente di loke bo ta 'click' riba dje. Pa hopi compania ta saliendo 'warnings' pa percura pa nan paginanan ta 'secure' y confiabel, Lindor a remarca.