ORANJESTAD (AAN): Presidente di Parlamento, Edgard Vrolijk a duna di conoce cu e siman aki a habri cu tratamento di presupuesto di Pais Aruba.
E presupuesto a reparti'e den e diferente comisionnan unda cu ta bay cu e diferente lidernan di fraccion pa defini con ta atende cu e reunion.
Den e caso aki, a parti'e den cuater pida, pero esey no kiermen cu ta termina cu e minister mesun dia y ta sigui e siguiente dia. A duna espacio pa tin caminda cu por cana y esey por ta un of dos siman dependiendo con lihe e ta bay, a splica.
Edgard Vrolijk a agrega cu dialuna a cuminsa cu Minister di Energia y Labor, Glenbert Croes hunto cu Minister Geoffrey Wever di Economia, Comunicacion y Desaroyo Sostenibel. Si pa awe diamars nan keda cla, lo sigui cu Minister di Husticia Rocco Tjon, Minister di Enseñansa y Deporte Endy Croes.
E di tres fragmento lo bira Minister di Turismo y Salubridad Dangui Oduber, Minister di Transporte, Naturalesa y Adulto Mayor Ursell Arends. E ultimo grupo ta inclui Minister di Finansa Xiomara Maduro y Minister di Asuntonan General Evelyn Wever-Croes. Cada dos dia dos minister, Vrolijk a indica.
E reunion ta wordo teni pa eerste ronde y tweede ronde y na final ora cu caba cu e 4 sesionnan aki lo bay over na votacion, a bisa.
