Ainda San Nicolas por desaroya como e distrito di arte di Aruba
ORANJESTAD (AAN): Por corda con algun aña atras, San Nicolas tabata den un luz hopi positivo ora cu a cuminsa promove e distrito aki como un distrito di arte pa Aruba.
Oh yes, San Nicolas a haya un bida! Si, un bida cua tabata tin e meta di converti e parti aki den un zona cu por a wordo yama un distrito di arte. Algo similar na Wyndwood na Miami, cual ta un bario cu tabata conoci pa ta uno hopi peligroso y sin desaroyo, pero cu despues a wordo converti den e cuna di arte di Miami y awendia ta uno masha bishita mes pa e turistanan y esnan cu ta bishita Florida.
Wel, por bisa cu San Nicolas, en berdad mester por haya un bida. Mescos cu e tempo ey cu tabata tin yen plan pa San Nicolas. Pero no solamente door di pusha inversion, pero den motiva e artistanan pa sigui pinta nan muralnan bunita y atractivo reflehando asina un estilo di bida. Un cultura, e arte di Aruba.
Den esaki tambe mester por elogia e esfuersonan actual di Minister di Asuntonan Economico, Comunicacion y Desaroyo Sostenibel, Geoffrey Wever, ken recientemente a duna hopi sosten na e iniciativa YES! (Young Entrepreneur Summit), cual ta busca motiva e hobennan pariba di brug pa bira empresarionan exitoso.
E recuperacion di San Nicolas ta awor den man di e hobennan cu ta birando mas consciente di e importancia di ta parti di e desaroyo economico di Aruba y en particular pa San Nicolas unda mester di un participacion fuerte, pero sostenibel.
San Nicolas, tin un potencial enorme. Y esaki a keda demostra caba den pasado cu e ferianan di arte y e eventonan cu a duna e distrito aki un 'push' tremendo.
Awendia, un biaha mas por mira cu San Nicolas ta wordo lubida. Leu leu tin algo ta sosode eynan. Ta berdad cu un ke otro negoshi a habri locual ta un desaroyo basta positivo. Pero algo mihor mester por sosode na San Nicolas.
Ken no a yega di bishita San Nicolas un diasabra of un diadomingo? Algun di nos. Pero no ta mira cu mucho cos tuma lugar eynan. Tin cu ta pasa den un bocht den caya principal, pero nada! E ora ta sigui e caminda pa bay Colony of Baby Beach.
"Lo tabata bunita pa topa cu algun actividad cultural", "pa pasa come algo crioyo den un feria di cuminda of bishita algun exposicion di arte". Esey ta expresionnan di algun ciudadano cu por a tende recientemente.
Papia di hotel, papia di negoshinan, pero sin un plan consistente, structural esaki ta leu di wordo logra.
Ta berdad cu San Nicolas Business Association ta trahando duro pa hopi cos sosode. Pero mientrastanto, mester di mas sosten, di mas plannan di ehecucion pa San Nicolas por yega te na e lugar unda e mester ta.
E recuperacion economico di Aruba mester sosode pareu. Y den esaki San Nicolas ta parti esencial.
San Nicolas tin museonan, tin su caya principal, tin su areanan di recreacion, su hendenan cu ta dun' e realce y e ingredientenan magico pa e soño di e hobennan cu kier bira empresario por sosode.
Minister Wever mes a yega di bisa cu e empresanan chikito y mediano ta e “back-bone” di un economia, y San Nicolas lo lidera esfuersonan pa logra e era nobo di desaroyo economico pa Aruba.
Tin entendi cu YES! lo a tuma lugar den e weekend cu a caba di pasa. Ohala cu YES! San Nicolas por logra cende e chispa den algun hoben pa nan tambe acepta e reto di haci nan propio negoshi.
Hunto nan por defini y crea e era nobo di desaroyo, no solamente pa San Nicolas, pero pa Aruba henter tambe.
