E prome lora 'Yellow-Shouldered Amazon' cu tabata extinto ta bulando bek den naturalesa di Aruba

FPNA lo laga e resto di e Lora bula bay na dos diferente ocasion den e proximo 2 simannan

ORANJESTAD (AAN):  Fundacion Parke Nacional Aruba (FPNA) ta anuncia e reintroduccion di e parha extinto yellow-shouldered amazon, localmente conoci pa e Lora, bek den naturalesa di Aruba.

            For di e 25 Lora sobreviviente cu a wordo trafica ilegalmente via lama pa Aruba hunto cu otro bestianan na 2022, e prome 9 Lora a ser laga liber den Aruba su naturalesa den Parke Nacional Arikok como parti di Fundacion Parke Nacional Aruba su plan di reintroduccion.

            FPNA lo laga e resto di e Lora bula bay na dos diferente ocasion den e proximo 2 simannan. E reintroduccion di e Lora ta parti di FPNA su “Species Conservation & Reintroduction Program” cu tin como meta pa establece un populacion cu por sostene nan mes na Aruba pa e proximo decadanan. 

Pakico e Lora a desaparece na Aruba?

            E Lora (Amazona barbadensis) ta localmente un especie extermina na Aruba for di aña 1947, pero semper a keda cu un luga significante den e herencia ecologico y cultural di Aruba y den e curason di e comunidad.

            E Lora ta conoci pa ta hopi social y inteligente y e temponan aya, localnan por a goza di mira nan bula den naturalesa di Aruba te ora cu nan a bira extincto. Populacion di e Lora ta existi na areanan isola na Boneiro y Korsou, como tambe na algun partinan nort di Venezuela y islananan di Margarita y La Blanquilla.

            E Lora a wordo evalua pa ta riba e “IUCN Red List of Threatened Species” na aña 2021 pero ta estima cu e populacion den naturalesa actual ta menos cu 10,000. Pa Aruba specificamente, e Lora ta protegi pa ley bou Ordenansa di Naturalesa, (AB 1995 no. 2, Art. 4 /AB 2017 no. 48).

            Tin hopi menasa pa e poblacionnan di Lora y mayoria di e menasanan aki ta di origen humano (Birdlife International 2017, Silvius 1991).

            Pa Aruba particularmente, e extincion di e Lora ta debi na jaagmento illegal pa bendemento como mascota, y matamento di e lora pa motibo cu e ta wordo considera un plaga pa agricultura (Voous 1983). Fuera di e menasa di origen humano, otro menasanan local serio ta especienan manera pushi y djaca.        Contrario di creencia popular, e Boa no ta e causa principal pa e desaparicion di e Lora na Aruba door cu e Boa solamente a wordo ‘introduci’ riba e isla den añanan 1990. E Boa no ta considera e menasa di mas grandi pa motibo cu nan tin limitacion den cuanto nan por come compara cu otro otro bestianan ‘sanger cayente’ y tambe investigacion ta mustra cu mas y mas e Boa ta ser encontra den areanan urbano compara cu den naturalesa.

            Un otro menasa cu a contribui na e extinction di e Lora ta e desaparicion di nan habitat causa door di rosamento pa desaroyo. 

Pakico e reintroduccion di e Lora ta importante?

            E Lora tin un funcion ecologico importante, particularmente den distribucion di simia den nos naturalesa, contribuyendo na engrandecimento di nos flora y fauna cu na nan turno, ta sostene un esencia mas amplio di e bida salvahe.

            Pesey, e reintroduccion di e Lora no ta solamente importante pero tambe necesario pa asina habitatnan local por beneficia di dje, pa engrandece biodiversidad, y contribui na e salud general di e systema ecologico di Aruba. FPNA su meta ta pa establece un populacion cu por sostene su mes y asina restaura e populacion salvahe di Lora pa futuro generacionnan. 

            Ta importante pa tene cuenta cu e reintroduccion di e 25 Lora e aña aki ta solamente e comienso y lo rekeri suplementacion anual pa asina e populacion salvahe por enberdad sostene su mes. Na e momentonan aki, e Lora tin 1 aña y mey y por solamente cuminsa reproduci ora cu nan tin aproximadamente 7 aña. Esey kiermen cu e lo tuma decadanan prome cu Aruba por wak un populacion cu ta sostene su mes – pero mester cuminsa un caminda.