Presidente Ivan Duque Marquez di Colombia a lansa advertencia --- *Grupo clave na Colombia ta spierta pa e armamento di Venezuela --- *Agencia di Viahe Ruso mester stop su tournan pa region di Caribe
ORANJESTAD (AAN)- Durante e fin di siman largo DIARIO a sigui tur desaroyo entorno e conflicto serio na Ukraine, caminda Vladimir Putin, a expresa e realidad pa cual DIARIO for di principio a adverti.
Putin lo menasa cu uzo di armanan nuclear si esaki ta necesario debi na varios factor manera e hecho cu Putin ta un lider Comunista di alma y curpa cu fungi den pasado pa e peligroso servicio secreto di Rusia, KGB.
Mientras e guera cayente ta wordo bringa leu for di Aruba, por papia di un conflicto mundial debi na e resultadonan economico serio cu lo tin manera DIARIO a splica for di un principio di e crisis mundial.
E guera ta wordo bringa na Europa pero esaki no ta nifica, cu resto di mundo no mester ta cauteloso debi na e presencia Ruso rond mundo.
Na inicio di e fin di siman largo, por a scucha e voznan di gobernantenan Colombiano cu mas insistencia mientras region di Caribe y Latino Americano a haya mas prueba di e conflicto mundial, cu ta presenta e realidad cu mundo a ignora.
“Pegas Tourisk ta nomber di e agencia di biahe Ruso cu tabata hiba turista Ruso pa entre otro Venezuela y awor a splica cu e buelonan no por sigui.
Mientras turismo for di Rusia pa diferente otro pais na America Latina y region di Caribe mester biba cu cancelacion, E Presidente di Colombia a expresa e berdad berdadero, cu ta e spiertamento cu Rusia no mester kere cu e por bin crea un situacion di Ukraine na Continente Latino Americano.
For di principio e expansionismo di Comunismo tabata uno di e peligernan pa cual DIARIO a adverti.
Venezuela ta un sateleti real y total di Comunismo.
Informacionnan for di Colombia ta indica cu Venezuela a wordo fuertemente arma dor di Gobierno Ruso, manera ta e preocupacion di DIARIO, debi na e peliger cu ta existi pa Aruba tambe.
Mientras e Gobierno di Colombia a duna tur su sosten na NATO, cu ta duna sosten na Ukraine, DIARIO a sigui atende e peliger pa seguridad nacional di Aruba den e situacion actual.
E seriedad ta presente na Venezuela, cu no tin ni sikiera un Gobierno legal. Dor di e problemanan cu a cuminsa, a lubida e crisis di gobernacion di Venezuela cu a keda den man di Nicolas Maduro, cu a manipula cu eleccionnan.
Nicolas Maduro tin un problema serio cu Union Europeo cu despues di e ultimo eleccion na Venezuela a duna prueba di e situacion serio na Venezuela, caminda Juan Guaido no por a participa na e ultimo eleccionnan.
Esaki a haci cu Nicolas Maduro a reclama poder di Asambra Nacional di Venezuela, loke a haci cu Juan Guaido den e confusion total a parce di no tin poder mas na Venezuela, loke resto di mundo no ta acepta.
E situacion na Venezuela ta dramatico cu poder militar pisa di Rusia y cooperacion total di otro paisnan manera Belaruse, cu awor tambe ta bou medida a base di e conflicto actual.
Ta for di Belaruse tambe Rusia ta ataca Ukraine.
E palabranan y preocupacionnan di Gobierno di Colombia ta sostene spiertamento serio pa e menasa serio cu ta existi pa seguridad nacional di paisnan den nos region cu Venezuela como satelite incondicional di Rusia.
Den e cuadro aki mas cu nunca, costa di Aruba mester wordo vigila y Aruba mester ta alerta pa un situacion peligroso dilanti su costa.
