Aruba Food & Beverage Association: --- *Ademas di falta di personal y prijs halto di materia prima
ORANJESTAD (AAN): Un di e retonan cu tur sector a experencia na Aruba den e ultimo aña ta esun di e pandemia. Esaki tambe ta un di e retonan cu e industria di cuminda y bebida a confronta.
E PR di Aruba Food & Beverage Association, Natalia Schoofs-Delgado a señala durante un entrevista recien cu DIARIO cu e pandemia ta un di nan retonan mas grandi. "Esaki ta un industria hopi vulnerabel y mi ta kere cu e reto principal na e momento aki ta e incertidumbre cu e pandemia ta genera".
Aunke poco poco a cuminsa sali for di e crisis y teniendo cuenta cu e flexibilisacion di e medidanan ta dirigi na e normal nobo, locual si ta premira ta cu otro variante nobo por aparece y por pensa atrobe riba cierenan of medidanan nobo.
"Mi ta kere cu e incertidumbre aki ta limita nos, pero ta pone nos pensa den grandi of bira mas creativo", a splica.
E costo di e productonan, manera a wordo treci dilanti den un otro articulo, tin e tendencia na un aumento di prijs, locual a afecta e industria. Hopi biaha ta dificil pa e cliente compronde cu e mesun cuminda pa cual e tabata paga $20, probablemente awor e lo tin cu paga $25. "E cliente no ta percibi esaki como un consecuencia logico di e situacion, sino cu ta pensa cu e lugar a bira caro", Schoofs-Delgado a señala.
Banda di esaki el a bisa, tin e problema di falta di personal. Esaki a sosode por ehempel, na inicio di e luna aki, ora cu hopi hende mester a bay den cuarentena of a sali positivo na Covid-19. Esaki a afecta e servicio y e calidad hopi mes, a remarca.
Esaki ta bay wordo refleha den e percepcion cu ta wordo duna na e turista, pero tambe na e cliente local, e vocero di AF&BA a duna di conoce.
