Miembro di Parlamento y acusado di Husticia pa acto como Ministro --- *Terenonan di Bo Aruba a keda misterio pero casnan di Colony ta bibo --- *Hulanda ta haya base pa splica pakico mester di “tik op de vingers”
ORANJESTAD (AAN) -- Hulanda na 2020 a presenta e exigencia cu mester ta posibel pa Hulanda haya oportunidad pa propina Parlamento un “tik op de vingers” si e ta considera esaki necesario.
Aruba cu razon ta bisa cu Statuut no ta permiti esaki. Hulanda otro siman sigur lo haya oportunidad pa bisa, cu realidad si ta exigi pa Hulanda por propina un “tik op de vingers”.
Otro siman e momento ta yega, cu Benny Sevinger, hunto cu e resto di grupo basta interesante di acusadonan den e caso Avestruz, mester presenta den Corte.
E tratamento “pro forma” di otro siman ta habri porta pa durante e ultimo parti di 2022 of na inicio di 2023, e caso mes bini dilanti.
E momento cu Benny Sevinger presenta dilanti Huez ta comberti sala di Corte di Husticia den un school pa splica e separacion di poder, riba cual e gobernacion di Aruba ta basa.
E momento lo sirbi tambe pa duna prueba, cu democracia no a resta pia pa para ariba na momento cu Benny Sevinger siendo Miembro di Parlamento presenta dilanti Huez pa defende su mes contra acusacionnan di crimen cu e lo por a comete durante su tempo como Ministro.
E cantidad di acusado den e caso den cual Benny Sevinger ta e figura central, tin algun aspecto special.
Na prome lugar ta resalta e relacion entre e grupo di acusado y e partido politico di Benny Sevinger. Hasta por bisa cu tin acusado cu tabata cu e partido di Benny prome cu Benny a pensa cu un dia e lo bira Ministro.
Sinembargo, e partido di Benny AVP hasta ta grita nan sosten pa Benny pero no ta splica pakico nan no tabata na haltura di loke segun e acusacionnan lo a pasa.
E hecho cu nan no tabata al tanto di loke segun e acusacionnan, na forma ilegal tabata wordo haci dor di Benny como Minister ta mas sorprendente ora mira con Benny hunto cu su lider di partido, Mike Eman, tabata atende cu proyectonan di e fondo Bo Aruba, cu tabata basa riba tereno tambe.
Segun Algemene Rekenkamer Aruba despues di bishitanan den bario, proyectonan di Bo Aruba tabata aumenta den cantidad.
Esaki no ta tur. Tin un rapport mas cu ta atende cu e casnan na Colony como parti di e investigacionnan di “Refineria di Aruba” cu gastonan cu ta pone nubia yora awasero.
Tabata tin un caso den cual Huez a “tik Benny op de vinger” prome cu Hulanda a haya oportunidad.
Mey Miyon (570 Mil Florin) di Aruba a wordo uza pa drecha un solo cas cu a keda atras.
E rapport di Refineria di Aruba ta relaciona cu e amor entre Nicolas Maduro y Gobierno di Mike Eman cu a spart placa di Aruba den un supuesto proyecto pa trece refineria hunto cu Nicolas Maduro.
Aparentemente e tempo di refineria tabata tin holoshi costoso cu a yega Aruba como regalo y tambe placa lo a wordo manda, pero kico a pasa cu e placa ni Venezuela por a bisa.
Aruba ta prepara pa mira Trias Politica reuni den sala di Corte di Husticia otro siman.
E nota mas curioso den e caso aki ta keda e expresion di e abogado di Benny Sevinger, cu publicamente a bisa cu algo a socede.
Pero segun e abogado, Benny ta un alma inocente cu a bira victima di su confiansa den otro hende. Kende e hendenan ta? Acusadonan yega na su partido?
Hulandesnan a exigi posibilidad pa nan propina un “tik op de vinger”. Nan no a papia di “lange vinger” ni di “korte vinger”. Nan no a papia di Sevinger.
Cu hopi interes nos ta en espera di e dia cu Benny Sevinger como ex Ministro mester presenta dilanti Huez. Mientrastanto e ta keda Miembro di Parlamento cu pa Ley mester duna gobernantenan un “tik op de vinger” si nan faya.
Kico mas ta resta pa por cera e resumen? Risa of lagrima?
