E importante di HOFA ta cu ta reduci gasto di interes di minimo 366.5 miyon Florin

Geoffrey Wever den Town Hall di AHATA

ORANJESTAD (AAN): Ministro Geoffrey Wever a participa den e Town Hall hunto cu AHATA y su miembronan tocante Rijkswet HOFA y LWHO.

   Segun Wever, su meta ta pa comparti informacion corecto, scucha preocupacionnan y contesta preguntanan tocante kico e leynan aki realmente ta significa pa Aruba.

   Durante e sesion, a papia tocante un punto hopi importante: e beneficio financiero directo pa Aruba. Cu Rijkswet HOFA, Aruba por realiza un reduccion di gasto di interes di minimo Afl. 366.5 miyon. Ademas, Aruba lo por tin acceso na financiamento den futuro na un interes considerablemente mas abou cu loke nos por haya riba mercado internacional.

   Pa Ministro, e pregunta principal semper ta: kico esey ta significa pa pueblo di Aruba.  E contesta ta cla. E placa cu e isla ta spaar na interes por wordo re-inverti den prioridadnan real pa nos comunidad, manera infrastructura, scolnan, transporte publico, sector primario y mantene Aruba limpi y atractivo.

   Nos propio futuro: Manteniendo control riba nos propio futuro financiero y presupuestario.  Un danki na AHATA, su directiva y su miembronan pa e dialogo habri, constructivo y productivo.