Mester tene na cuenta: - ORANJESTAD (AAN) – Un bon informacion pa e personanan cu no a vacuna ainda, pero a registra pa e vacuna, y sigur mayornan cu tin mas cu tres siman wardando pa nan yiunan (12-17 aña)
haya fecha pa e vacuna contra Covid-19, ta cu via Aruba Health App nan ta keda registra si, pero no ta wordo duna mas e fecha di vacunacion manera si a haci na inicio.
Ta asina cu mester yama na telefon 280-0101 pa averigua ki fecha tin pa e hoben bay vacuna na DBZ na Playa.
Awo cu falta diez dia so pa apertura di e aña escolar nobo, tin hopi mayor y hobencito mes cu kier cu kier haya e vacuna prome cu scol cuminza. E persona cu ta tuma yamada na e telefon indica ariba, ta sumamente amable y e ta busca e fecha pa e hoben cu su datonan di registracion cu tin den e app.
Si ta asina cu mester insisti di marca e number un y otro bez, no give up, pasobra henter dia tin hende ta yama y por sona ocupa. Asina tanto hende (y mayor sigur) ta yamando.
Ta bon pa reitera cu e muchanan mester bin acompaña pa un mayor, of den caso cu ta un wela, welo of otro adulto responsable, e mester presenta un autorizacion di un di e mayornan di mucha.
Tambe e mucha mester bay cu su carchi AZV y passport pa confirma e edad. Ora di yama e dama ta informa na unda e mucha tin cu bay pa ricibi e vacuna, por ehemplo si ta na DBZ of otro centro di vacunacion.
Ta di spera cu e informacion aki, cu a wordo divulga caba den un conferencia di prensa reciente, pero cu kizas diferente persona, vooral mayornan no a paga tino na dje, lo sirbi pa aclarea con pa haya un fecha exacto di vacunacion.
