Stichting Avondonderwijs cerca Formador: - *Un plan cu hopi aspecto bunita pa avondonderwijs
ORANJESTAD (AAN) – Juffrouw Ginny Croes, y señora Nathalie Wever, director di Avond-Havo, hunto cu Meneer Melvyn Loefstok, a representa Stichting Avondonderwijs den e reunion cu Formador Evelyn Wever-Croes y partner di coalicion, den e proceso di formacion di gobierno nobo cu ta tumando lugar.
Den e conferencia di prensa cu a sigui, despues di e reunionnan cu stakeholders, Juffrouw Ginny Croes a hiba palabra y a expresa cu Stichting Avondonderwijs ta masha contento cu por a haya un chens pa por a sinta cu Formador y duna un splicacion di e puntonan cu ta hopi importante na e momento aki.
E dama a bisa cu e reunion a bay na un forma hopi ameno, y nan ta hopi gradici cu Formador. Señora Croes a menciona cu ultimo aña, door di covid-19 tambe, entre otro, tin basta tempo cu no a sinta cu Minister di Enseñanza y esey ta loke durante e reunion cu Formador nan a logra a trece dilanti nan preocupacionnan tambe.
Un ehemplo ta e asunto di “los uren beleid” riba cual ainda e stichting no a haya un contesta por escrito. Nan a papia tambe tocante enseñanza en general, y den esaki a papia di otro prioridad cu ta e meerjarenplan cu nan a entrega y cu no a wordo aproba door di e minister, y nan kier sa kico ta e motibonan y con nan por nan por yega na un plan cu si por wordo aproba.
Señora Nathalie Wever a splica cu e meerjarenplan enberdad a wordo entrega na e anterior minister di Enseñanza Rudy Lampe, pero el a keur esey af pero nan deseo ta pa e wordo aproba pasobra den dje tin hopi cos bunita pa cu avond onderwijs, entre otro, nan kier bay digital.
Director di Avond-Havo a indica cu avond onderwijs ta pa adulto y tin studiante cu tin trabao y no tur ora por ta presente den les, y scol kier hacie mas accesible, cu nan por sigui les na momentonan cu nan tin tempo pa haci nan lesnan y tin esakinan na nan disposicion.
Entre otro, el a agrega, esaki ta un plan hopi mas grandi pero esaki ta un di e puntonan cu djis, nan kier a enfoca den reunion cu Formador Wever-Croes.
