Coordinadora Sharine Croes-Dubero
ORANJESTAD (AAN) – Sharine Croes-Dubero, Coordinador di Arubalening, a splica den entrevista cu DIARIO, tocante e manera con e studiantenan cu ta bay sigui estudio pa un carera profesional, ta haya e informacion cu nan mester.
El indica cu e aña aki, nan a haci un proyecto piloto, pa prome biaha titula “Bay pa bay” cu ta un programa pa prepara e studiantenan, pa nan ta miho prepara, sea cu nan ta bay sigui estudio sea na Aruba of den exterior.
Sharine a bisa cu e hobennan por ta, na cuminzamento, ta bin un tiki forza, pero na final e experiencia tabata bon, y nan a siña hopi. El a agrega cu e manera con e tayernan di trabao a wordo duna, na un forma hopi inter-activo, a yuda nan hopi. E hobennan a siña tambe con pa yena e contrato, kico nan tin cu tene cuenta cu ne, cuanto placa nan ta haya, pa nan realiza cu nan tin cu traha cu presupuesto, y a constata cu e feed back ta hopi bon. E intencion ta pa sigui monitor e grupo cu a participa, y tambe esnan cu no a presenta, pa wak con nan ta bay.
Sharin Croes-Dubero ta haya cu nan ta bayendo hopi miho. “Loke nos ta haciendo e ultimo tempo, ta cu si e studiante no ta haal su propedeuse den dos aña, nos ta stop e prestamo, pasobra eynan nos ta perde nan. Por ta nan a sigui pero nos ta perde nan. Si bo no ta bayendo bon, si den tres aña bo tin tiki study punt, eigenlijk nos ta paga dos aña extra, pero si den cuater aña bo puntonan no ta suficiente, nos ta stop’e tambe. Dus, nos ta monitor esey tambe un tiki di cerca. Enberdad nos ta bezig pa wak con nos tin cu update nos programa pa nos por saca e cifranan ey mas facil”, Sharine Croes-Dubero a duna di conoce.
