Presidente di Parlamento Edgard Vrolijk:
ORANJESTAD (AAN) – Presidente di Parlamento mr. Edgard Vrolijk, a bisa den un entrevista cu un tema di discusion durante e encuentronan interparlamentario IPKO, ta cu mester crea un fondo, no solamente pa calamidad, pero tambe pa e asuntonan di mas urgencia, por ehemplo, na Hulanda por crea un fondo pa Enseñanza.
E ta corda cu algun tempo pasa a crea e “Fondo di Desaroyo” unda cu Hulanda a duna su aporte y Aruba tambe. Den e structura aki tin pensa riba un fondo separa pa calamidad, por si algo pasa.
Vrolijk a subraya cu mester crea un fondo so, pero mester percura pa e pais su finanzas ta na orden. Pasobra na momento cu algo sosode, si Aruba tin un debe cu ta core na 50 of 60% di su GDP, nunca Aruba mester a bay fia na Hulanda, pasobra lo tabata tin e espacio pa por a continua.
Na dado caso, Aruba tabata horca na casi 80% di su GDP y ora cu Covid 19 a dal nos pais, el a yega te na 127% di nos GDP cu casi Aruba tabata bancarota.
Esaki ta un punto importante cu nan tabata tin den debate di e parti financiero ey, y Vrolijk ta kere cu mester hancra den Aruba su Constitucion un “Vaste Norm” tambe pa locual ta e maneho financiero na Aruba. Kiermen, cu ken cu bin no por desvia di dje.
