Dr. Jayburtt Dijkhoff, PhD:
- E ta boga pa un cambio!
ORANJESTAD (AAN) – Dr. Jayburtt Dijkhoff, PhD, a sigui splica den entrevista cu DIARIO, cu den e ultimo capitulo di su buki “E Derechonan di Pashent”, e ta indica cu falta mas pa haci na Aruba.
E derechonan individual di pashent ta un base enberdad, pero mester traha riba e aspectonan cu falta. “Ora cu un persona bay Colombia, por ehemplo, y e ta haya resultado, e tin cu bin bek na su medico tratante. E ora ey tin e pregunta si e medico tratante tin confianza den e Clinica cu a haci e testnan, si e kier coopera of ta bisa pa ban haci tur test di nobo, pasobra e ta e medico tratante y e ta carga e responsabilidad.
“Kiermen, e parti ey no ta regla den ley. No ta regla ningun caminda. Esey ta hustamente unda e buki aki ta haci un yamada pa nos activa e ‘Plataforma Pashentnan di Aruba’ pa haya un grupo cu por traha na beneficio y interes di e pashentnan, cu por dialoga cu gobierno tambe, pa nos djis bringa pa e partinan aki, wordo regla den un forma corecto y cu ta wordo carga tambe door di comunidad, y e pashentnan na Aruba”, Dijkhoff a señala.
El a agrega cu den e buki e tin un capitulo di AZV y con esaki ta influencia e derechonan di pashent, y tin varios punto, pasobra si, por ehemplo, e ley no cambia y duna e pashentnan mas transparencia tambe, casi nos por bisa cu nos no sa con exactamente e influencia ta funciona riba e derechonan existente.
Un ehemplo di esaki ta cu AZV no ta publica su “Model Contractnan”, kiermen no ta conoci précis kico ta para extra eyden, cu por amplia e derechonan of, hustamente, pone limitacion na dje. Ademas tin e parti cu tin lista di espera, entre otro aspectonan cu ta primi riba e derechonan di pashent, y no tin un plataforma cu ta bisa “warda, esaki ta experiencia di pashentnan di Aruba, esaki ta kico ta pasando, ban papia cu gobierno pa cambia e maneho nacional. Esey ta hustamente loke mi ta boga den e ultimo capitulo tambe, pa nos por haci e cambio ey”, Dr. Jayburtt Dijkhoff a señala.
