Durante Aruba Fashion Week, RONCHI DE CUBA lo presenta su Haute Label “Aruba Alegria”

Dia 30 di November proximo,

ORANJESTAD (AAN):  Nos maximo diseñador di moda, Ronchi, lo presenta su Haute Label durante Aruba Fashion Week. E coleccion maximo di nos diseñador local ta wordo presenta cada 5 aña. Na 2019 por a aprecia e coleccion durante “30 Years of Style” su celebracion di 30 aña den moda.

            Awor pa 2024, celebrando 35 aña como diseñador di moda y productor, Ronchi ta cla pa presenta un otro espectacular coleccion. E biaha aki cu e inspiracion “Aruba Alegria”. 

            Un coleccion cu ta e punto climactico di moda di nos pais. Colorido, energetico y cu telanan exkisito e RONCHI DE CUBA Haute Label pa 2025 sigur lo acapara atencion. Manera ta custumber Ronchi semper ta usa mayoria di modelo local pa su desfile y ta concentra ariba diversidad di look. “Mi a realisa mi propio casting y a mira locual e evento tin pa ofrece y asina a yega na e modelonan cu lo cana mi pasarela” Ronchi a duna di conoce. 

            Pa locual ta trata e coleccion Ronchi ta informa “Alegria Aruba ta un coleccion di nos maximo label RONCHI DE CUBA Haute Label. E ta encera e vibracion di nos isla. E alegria di nos hendenan. E carisia di nos biento y e sunchi di nos solo”. Algo no usual mirando cu Ronchi semper ta wordo inspira door di Aruba. 

            E diseñador ta pone enfasis ariba e falta di apoyo pa nos diseñadornan local. “E entidad local concerni cu turismo y otro industrianan mester por aporta mas na nos creativonan local” Ronchi ta informa. “Quizas un fondo apart disponibel pa desaroya talento local lo ta na su lugar” Ronchi ta bisa. 

            Ronchi ta invita Aruba en general pa presencia e Aruba Fashion Week y asina apoya e diseñadornan local cu ta participando. 

            “Pa locual ta trata mi show por spera piezanan deslumbrante cu ta representa nos isla y su alegria” Ronchi ta finaliza.