Dr. Horacio Oduber Hospital cu sosten di varios sponsor a lansa proyecto 'Jump18'

ORANJESTAD (AAN): Dr. Horacio Oduber Hospital hunto cu varios partner a anuncia diamars atardi un proyecto hopi interesante cu yama 'Jump18'.

E proyecto aki cu ta pa prevencion di obesidad cerca mucha a wordo introduci door di pediatra Dr. Jamiu Busari.

A conta cu presencia di Director di Hospital Jacco Vroegop como tambe di sponsornan: ENNIA, Aruba Rotary Club y Kiwanis Club.

Dr. Busari a a haci referencia na e cantidad di hobennan na Aruba cu ta confronta cu problema di obesidad esaki relaciona na e estilo di bida cu e hobennan aki ta hiba.

Segun cifranan di UNICEF, sobrepeso y obesidad ta un di e problemanan mas grandi cu mucha y hoben ta enfrenta den e edad di 4 pa 18 aña.

Jacco Vroegop a expresa cu e ta masha orguyoso cu e comienso di e proyecto aki y cu tur esnan cu a traha riba dje. El a agrega cu esaki ta algo hopi importante pa hospital, pero mas hopi pa tur e muchanan na Aruba cu ta sobrepeso.

Pa e ocasion aki a lansa un video pa anuncia e proyecto 'Jump 18' cual tin como meta yuda e hobennan tin un estilo di bida mas saludabel.

Dietista Charlene Leslie a duna di conoce cu 'Jump18' ta un programa special pa mucha entre 4 cu 18 aña cu tin sobrepeso of obesidad . E programa ta consisti di 6 luna y ta enfoca riba 4 pilar: educacion, alimentacion, actividad fisico y investigacion.

E programa ta bay consisti di consulta cu pediatra, dietista y un 'case manager'.

Na ocasion di e lansamento, ENNIA, como un di e sponsornan di e proyecto a entrega un donacion di 10,000 florin.

Mas informacion relaciona cu e proyecto aki lo wordo anuncia den e dianan aki.