DOW hunto cu expertonan a cuminza awo un “business case” pa studia kico mester haci cu RWZI

ORANJESTAD (AAN) – Director di DOW, Ing. Marlon Croes, a reitera den conferencia di prensa, como di tres punto di agenda,

cu DOW tin retonan tecnico pa loke ta e planta di Bubali, y a recorda kico a sosode den transcurso di Juni- Juli 2021, cu a surgi un brote di mal holo rond di e planta.

Croes a splica cu esaki tabata pa e simple motibo cu un di piezanan di e tanki a kibra y, consecuentemente, DOW a traha un plan na termino corto unda mester a cumpra cinco aquajet nobo, entre otro, y un quimico pa inyecta den e proceso, pa controla e holo. Cu esaki por a aumenta e rendimento di e tank di oxidacion pa por hinca mas zuurstof den dje pa e bacterianan, aumenta e calidad di awa pa evita y evita e mal holo.

Marlon Croes a splica cu na final di 2020, Gobierno a duna DOW 3.4 miyon florin, pa cumpra diferente ekipo pa nan por trece e planta na un nivel tecnico pa mantencion di e planta, mucho miho di loke tabata.

El a agrega cu DOW a ricibi 90% di e ekipo caba, den e transcurso di 2021, di cual 68 pa 70% ta instala; kiermen, nan ta treciendo e plantanan den bon condicion. Esaki ta e plan di accion na corto plazo cu ta tumando lugar aworaki. Si link esaki na locual Minister di Medio Ambiente a participa, den su rueda di prensa mas reciente, gobierno a pone disponible 16 miyon pa e aña aki, pa por bin cu un plan structural pa por sobrepasa e siguiente periodo. E 16 miyon aki DOW lo use pa drecha e oxidacion; pa bin cu un exidatiesloot nobo cu ta bay aumenta e calidad nobo, den nutriente bacteriologico. E ekipo di DOW ta bezig ta preparando tur e documentonan pa bay un destaho publico, y nan intencion ta pa e destaho publico tuma lugar na final di e prome cuartal di e aña en curso y logra tin e parti aki operacional pa e di dos mitad di 2023.

Croes a agrega cu den cada inversion cu wordo haci, mester pensa na un manera structural con pa hacie sostenible den tempo, y pesey ta bay start na comienzo di siman, conhuntamente cu diferente experto, un “business case” unda nan ta bay studia kico lo mester haci cu e RWZI; si e ta bay keda bao DOW  y di ki forma, of di ki forma lo wordo privatiza. Pues, lo bin cu diferente escenario, cual lo ta e miho vehiculo pa DOW aconseha gobierno pa tuma un decision riba dje.

E por bisa cu e lo keda na DOW bao di cierto condicionnan, of e ta bay bao un eventual PPP si ta mester. E beneficionan mester wordo midi den e gastonan di operacion, mantenimento y cual ta e miho manera, pa asina gobierno por tuma un decision, pa DOW traha riba un plan mas sostenible.  Pero esey kiermen cu placa mester wordo inyecta pa gastonan di mantenimento tambe, y esey lo bin na su debido tempo, Marlon Croes a señala.