DOW a atende 30 melding durante mal tempo di diamars mainta

Ing. Marlon Croes: *Madiki y Pos Chikito ta keda areanan vulnerabel

ORANJESTAD (AAN):   Director di Departamento di Obranan Publico (DOW), Ing. Marlon Croes a duna su declaracion relaciona cu e trabaonan cu mester a tuma lugar relaciona cu e mal tempo cu a afecta Aruba diamars mainta.

            El a duna di conoce cu den e caso aki por menciona cu Watty Vos Boulevard a inunda na altura di e rotonde di Sero Patrishi bayendo direccion Tanki Leendert. Como consecuencia di esaki sushi a acumula y awa no por a bay.

            Croes a bisa cu esaki ta un proyecto cu ta den man pa mantencion di Watty Vos Boulevard Project Company y el a wordo atendi riba dje y mesora nan a drenta den accion tambe pa hacie limpi.

            Esaki a trece como resultado cu den un par di ora e awa a bay completamente y por a habri e caminda bek pa trafico, a bisa.

            Segun Marlon Croes, for di 8:30 am caba, na e 'actie centrum' di DOW a cuminsa haci otro trabaonan. Por ehempel, na Zeewijk tabata tin caminda cu a inunda cu awa y pa esaki a mobilisa e consecionario di e trabao aki pa cera e caminda cu baricada, hunto cu Polis, pa evita cu tin auto ta pega den dje.

            Mientrastanto, DOW a cera Pos Chikito y Madiki pa evita cu autonan por a haya nan mes den problema debi na e cantidad di awa cu a acumula.

            Pa loke ta e cantidad di melding, DOW a ricibi 30 melding diamars mainta, di cual 20 ta trata di inundacion cu awa y 10 di matanan cu a cay, a indica.

            Pa loke ta e matanan, DOW a wak e prioridad relaciona cu strobamento di e fluho di trafico. A trim e mata y tambe a check e rais pa wak si e tabata den bon condicion pa lant'e bek. Pero si e rais tabata den mal condicion, el a putri of pa un otro motibo e no por a sobrebibi, DOW a kit'e di biaha, Croes a laga sa.

            A percura pa haci e trabaonan pa e trafico por a move bek lihe y despues a drenta den e fase di 'ruim op' y lanta e matanan cu tabata tin mester.

            A reitera cu Pos Chikito y Madiki ta keda areanan debil. Pa a area aki a mobilisa relativamente tempran. Pa algo pasa di 9'or DOW tabata 'on site' caba y cu e pomp por a drenta den accion pa evita cu e bisindario ta inunda cu awa.

            DOW a traha den cooperacion estrecho cu Brandweer. Tabata tin algun cas cu e cura a yena cu awa y den e caso aki Brandweer a drenta den accion pa evita cu e cas tambe por a yena cu awa, a splica.

            Finalmente, Marlon Croes a indica cu tur e accion a bay bon pa evita cu por a haya mas dañonan y aworaki loke tin ta trabaonan di drecha of di recupera, manera kita santo riba caminda, piki matanan y deshaci di e sushi cu a bin den e sistema di drenahe.

            El a agrega cu nan ta prepara nan sistema di drenahe durante inicio di aña pa asina por atende cu e problema di sushedad, pa ora cu e temporada di horcan cuminda 1 di Juni, pa tin esakinan limpi. "Pero naturalmente ora bo tin nan limpi pa 1 di Juni, aworaki por conta di 1 di Juni pa aworaki, por papia di casi dos luna y mey a pasa y bo tin otro vegetacionnan ta crece, takinan ta cay y e ta bini y ora awa cuminsa core e ta bin cu e debris aki y ta plug e sistema. Kiermen nos tin cu keda haci mantencion ariba e sistema di drenahe cu nos tin y wak pa esaki no yega na blokia". 

Potret: Facebook Page DOW