ORANJESTAD (AAN): Despues di basta tempo, diripiente Diabierna a habri y un total di 2 diferente temblor a wordo registra den cercania di Aruba.
E prome temblor a wordo registra Diabierna 4 di November pa 12:09 am, cu ta marduga. E magnitud di e temblor aki tabata un intensidad di 3.2º riba Scala di Richter.
Su centro a wordo localiza na 12.16º Nort y 70.84º West. Esaki ta como 95 kilometer West-Zuidwest di Punta Brabo, Aruba. Esey ta como 31 km Zuid-Zuidoost di Islas los Monjes.
E temblor di marduga aki tabata na un profundidad di 35.4 kilometer.
E di dos temblor a wordo registra Diabierna 4 di November pa 1:51 pm, cu ta den oranan di merdia. E magnitud di e temblor aki tabatin un intensidad di 3.5º riba Scala di Richter.
Su centro a wordo localiza na 11.73º Nort y 70.42º West. Esaki ta como 94 km Zuidwest di Savaneta, Aruba. E ta igual cu 25 km pabao di Punto Fijo.
E temblor di merdia aki tabata na un profundidad di 35.5 km.
