Cifranan na Hospital tambe ta aumenta - *Dos futuro mama y un mucha den Covid Afdeling
ORANJESTAD (AAN): Cifranan ta sigui drenta pero cu informenan hopi lamentable pa loke ta e aumento di casonan y fayecimentonan.
Segun resumen di diaranson, 41 persona a recupera y un total di 154 caso nobo di COVID-19 a keda registra di cual 14 ta turista y 140 ta residente.
E cifranan aki ta representa un 'Positivity rate' bou di e residentenan di 37%.
Cantidad di casonan activo di COVID-19 ta 986 y cantidad di fayecidonan relaciona cu COVID-19 a aumenta na 113 cu fayecimento di 2 residente cu edad medio, (menos di 60 aña) cu tabata interna den ICU y cu lamentablemente no tabata vacuna. Condolencia na famianan.
Datonan ta ilustra subida continuo di casonan nobo cu un average semanal di 113 caso pa dia y un average di 'positivity rate' semanal di 32% pa dia cu ta sigui subi.
Hospital tin 40 persona interna di cual 5 ta den ICU, 32 riba piso general, 2 riba piso di maternidad y 1 riba pediatria.
Datonan di hospital ta ilustra cu di e 40 personanan interna debi na COVID, 11 persona ta vacuna sea cu 1 of 2 vacuna y 29 persona no tin ningun vacuna.
