Dos hoben demostrando nan habilidad di dal algun sambuya acrobatico

ORANJESTAD (AAN): Recientemente na momento cu fotografo di DIARIO tabata na Pier di Savaneta

pa asina presencia e competencianan di Kayak riba e lama net ey dilanti, e bista a bay riba dos hoben menor di edad, kendenan tabata gozando un mundo di dal sambuya acrobatico.

   Ora cu e dos hobennan aki a mira fotografo di DIARIO, nan mes a pidi’e si acaso e por saca potret di nan training!

   Nan dos tabata gozando di e atardi aki na lama, door di bula for di e pier y trata di haci esaki den forma acrobatico y pa nan e tabata un berdadero ‘deporte aventuroso’ door di nan.  Pero alavez di adkiri experiencia den e bulamento, nan por ta habriendo caminda pa competi den futuro como atleta den cualkier competencia di ‘High Diving’, cu ta hasta un disciplina Olympico.

   E forma cu nan tabata dal nan “sambuya den aire”, cu awa sirbiendo como nan base safe di cay aden.  Y den e maniobranan di bula den awa, bo ta agrega algun “acto gimnastico” pa asina twist bo curpa, dal koprol, of haci salto mortal.

   Fotografo di DIARIO a keda agradablemente sorprendi pa e animo, perseverancia, y dedicacion di e hobennan aki.  Pa diez minuut largo, nan a dal algun bula pa demostra na lectornan di DIARIO, con avanza caba nan ta pa e bulamentonan aki.

   Nan a mustra cu nan stima lama, y nan ta encanta cu e aventura di bula for di pier, y agrega actonan gimnastico na dje.   Aki por mira algun potret di e hobennan aki saca door di fotografo Hubert Tiel.