Docente y studiantenan di Romania ta sigui goza di Aruba

ORANJESTAD (AAN): Manera cu DIARIO a trece dilanti recien, den cuadro di Erasmus+, un grupo di docente y studiante procedente di Romania a viaha te Aruba,

y aki nan ta bay enfoca riba Colegio Nigel Matthew na San Nicolas pa nan mira e diferencia di dunamento di les na nan pais compara cu Aruba.

   E prome dia na scol, nan a ricibi un bon bini di Rector ing. Ralph Croes, sigui pa un presentacion di Leerlingenraad cu a duna informacion di e scol, y loke nan ta haci.

   Despues e studiantenan di Romania a duna un presentacion cu a enfoca riba e beyeza di Romania, y tambe a mustra un pida di nan scol aya.  E studiantenan di Romania despues a sinta y haya les cu esnan di Aruba, mientras e docentenan di Romania a observa algun di e lesnan.

   Riba e di dos dia, e studiantenan un biaha mas a sinta den klas y haya les hunto cu esnan di Aruba.  E docentenan tambe a bay sinta y observa diferente les den klasnan.

   Despues di Pauze, nan a topa otro bek, y a sali cana bay check e muralnan na San Nicolas.  Bao guia di studiante Joseanne, el a haci un bon trabao splicando tur cos y mustra nan mas di San Nicolas.

   Despues di e tour di San Nicolas, e grupo a reuni pa ricibi les di cushinamento di studiante Zadie, kende a mustra con pa prepara Pico de Gallo, y sasona e galiña.  Asina nan a sinta disfruta di Taco delicioso.