DMH ta celebra un anochi exitoso cu lansamento di Toolkit Codigo y revista Asertivo di e proyecto #ACT4ECC

ORANJESTAD (AAN):  Riba Dia Internacional di Derecho di Mucha, Aruba, Departamento di Mucha y Hoben (DMH), cu cofinancianmento di Union Europeo pa e proyecto:

The Awareness raising and Capacity building Toolkit for European and Caribbean Children, #ACT4ECC, conhuntamente cu UNICEF Hulanda y cu sosten tecnico digital di Augeo Foundation, a lansa dos herment digital sumamente balioso na momento di traha cu Codigo di Proteccion, pa tur e profesionalnan cu ta traha cu y pa mucha.

            E team dinamico di DMH a lidera un proyecto super innovativo y moderno pa e profesionalnan cu ta traha den e 4 sectornan: Social – Husticia – Salubridad – Enseñansa, ta mas ekipa cu experiencia, experticio, conocemento y habilidad, na momento cu encontra caso di (sospecho) abuso di much ana Aruba.

            Di e forma aki marcando un paso historico y ehemplar pa region Caribense. Mas cu claro, tur comienso di algo nobo ta trece duda! Sinembargo un team chikito di DMH, consistiendo di; Surella Croeze, Efraim Suurendonk, Jullie-Ann Thode, Sue-Ann Ras, Mirta Leon y Laura Rumahloine (cu ya no t’ey mas) conhuntamente cu e contentgroep a sa di trece dilanti un contenido netamente local, pa tanto e Toolkit digital Codigo como e revista digital Asertivo, cu e necesidadnan principal relaciona cu uzo y conocemento di Codigo di Proteccion.

            #ACT4ECC ta un proyecto netamente pa aumenta conscientisacion y desaroyo di capacidad di nos profesionalnan pa proteccion di tur mucha den Reino Hulandes, particularmente Aruba y Corsou. Esaki ta demostra cu nos ta uni den Reino pa tin mas colaboracion y cooperacion, pa traha riba e Tratadonan di Derecho di Mucha y nan bienestar general. Hunto nos por manda un señal potente, cu nos ta dicidi pa traha riba un comunidad mas asertivo, resiliente y safe pa nos muchanan.

            Ta exigi un trabou den colaboracion amplio y structural. Mucha ta nos tesoro di mas balor y ta nos obligacion como comunidad, como profesional y gobierno pa percura pa nan lanta den un ambiente mas protegi y cu ta brinda nan e oportunidadnan husto pa nan desaroya.

            DMH kier gradici tambe dr. Louise Rafael Croes como Janine Rodriguez, pa tabata parti di e gran anochi aki, unda nan a conta nan experiencia trahando den veld y motiva tur profesional pa sigui traha cu pasion y dedicacion pa nos muchanan. Un palabra di gradicimento enorme tambe ta bay na e studiantenan di prome aña di sector SPW Welzijn di EPI, cu a duna tremendo asistencia, bou guia di docente Kyla Mailen Maduro.

            Si ta interesa pa nabega y haya sa mas di e dos hermentnan digital: Toolkit Codigo como e revista Asertivo, por bishita e website di www.codigodiproteccion.com y asina engrandece y empodera bo mes cu conocemento y habilidad practico.