Discjockey hoben local cu a cay for di piso 3 di parkinglot a fayece despues

Caso di Diadomingo anochi na Paseo Herencia

ORANJESTAD (AAN): Ta parce cu ningun hende a mira kico a socede, pero si un poco prome cu 7:00 pm, personanan eybanda a tende un sonido masha duro mes di algo cu a cay na suela.  Esaki ta net den e gang mas abao, meymey di e tiendanan di Beach ‘N’ Flips Aruba y Tommy Hilfiger den Paseo Herencia Mall na Palm Beach.

   Personanan cu a core yega cerca, a bin topa cu un hoben benta eybao cu ta for di tino, pero ainda ta halando rosea.  Mesora e hendenan aki a compronde cu e hoben a sali cay for di e muraya di un di e pisonan na halto.  Inmediatamente nan a cuminza yama Polis pa pidi yudanza urgente di autoridad y di Ambulans.

   Mesora Central di Polis a despacha unidad di Strandpolitie como tambe Polis di Noord pa bay check loke a pasa net na rand di e parkinglot y entrada di e mall.  Centro di Alarma a ser notifica y por lo menos 2 unidad di Ambulans a mobiliza pa e lugar.

   Polis a bin haya un hoben benta eybao cu visiblemente hopi golpi y trauma na su cabez, pero e ta na bida ainda.

   YUDANDO NA PULSO: Paramediconan di e prome unidad di Ambulans cu a yega, a baha y mesora a check e signonan vital di e hoben.  Aki ta unda cu nan a start inmediatamente practicando CPR como cu su pulso tabata instabil.

   Mientras tanto mas Polis a yega na e lugar, incluyendo Polis di Bario.  A cera full e area pa asina mantene e zona steril.  A cera parti di 3er piso y tambe parti di 2ndo piso pa no stroba parti di e investigacion.  Si ta for di Piso #3 el a cay, esey ta un haltura di como 10,5 meter.

   Un otro unidad di Ambulans a yega, y asina hunto e Paramediconan a traha bastante cu e victima eybao y ora cu porfin nan a cuminza keda satisfecho cu e pulso, a pone riba brancard, y cu urgencia pa 7:35 pm a sali rumbo pa Hospital.  Polisnan a yuda pa habri caminda pa e Ambulans por yega mas rapido posible.

   HOBEN DI 20 AÑA: Ora cu a yega na Hospital, a sigui traha cu e hoben aki na un forma mas tactico, mirando e hecho cu e lo tin hopi fractura interno.  Nan a keda traha cune pa 3 ora largo pa salba su bida, y el a keda hala rosea.  Pero pa 10:40 pm, Docter na Servicio di Emergencia a constata morto di e hoben, Luis Angel Figueroa Flores, naci na Venezuela dia 5 di Juli 2001 pues e tin 20 aña di edad.  For di edad chikito caba e ta bibando na Aruba, y ta papia Papiamento perfecto.  Fiscal a confisca e curpa pa asina practica autopsia pa haya sa motibo di morto.

   Vocero di Polis Liliana Rasmijn, a indica cu e hoben aki a sali cay for di Piso #3 bin abao finaliza riba e vloer mas abao di e Mall, net meymey di Beach ‘n’ Flips Aruba y Tommy Hilfiger.

   Autoridad a cera e piso #2 y tambe piso #3 pa e investigacion.   A laga Recherche como tambe oficialnan forensico di BFTO bin tuma tur detaye.  Su auto a ser haya na un di e pisonan aki, y tambe varios equipo di dje.  Posiblemente ta trata aki di su equipo di Discjockey.

   VARIOS TEORIA:  Ta un monton di teoria por a tende y lesa di dje den menos di 12 ora riba social media, riba e causa di caymento aki.  Recherche lo bay investiga tur esaki, pa haya sa si e ta un accident of si kizas tin mal wega den e asunto aki, of un crimen.

   E hoben tin un estatura halto, y e murayanan aki no ta dje halto ey.  Kizas el a pone su equipment riba e muraya y algo a bay malo cu uno a cuminza cay y el a bay su tras, y asina perde balans y cay.  Of kizas ta tratando di haci un selfie of trahando un meme.  Of kizas tin hende cu intencionalmente a push’e di halto.   Tur eseynan ta djis teoria, y ta Recherche tin di bay presenta su rapport final pa cu resultado di e investigacion.

   Hecho si ta cu e fayecimento di Luis Angel a laga un tristeza inmenso cerca famianan.  Conoci como un ‘mucha di cas’, e no ta envolvi den ningun vicio y ta gusta entretene hende, crea memes pa social media, y tambe pone hende hari.

   DJ LOUISVILLE:  For di como 9 aña di edad, su mama y ruman muher a cumpli cu su deseo y a regal’e un Equipo Basico di DJ.  For di e tempo ey el a cuminza mezcla cancion, haya sa con pa crea su mesun bootleg, scucha famoso DJ ta mezcla y e tabata purba imita.

   Resultado di esey ta cu for di trempan el a sa di domina e arte aki di Discjockey.  El a escoge e nomber artistico di ‘DJ Louisville’ y cu su animo y perseverancia el a cuminza haya contract pa toca na diferente lugar, e.o. na algun boda, tambe na Fiesta di Prom, a yega di toca tambe na Emotions Nightclub, na Craft, tambe na YOLO, Chupitoz, Sand Aruba, y na diferente ocasion ta yuda esnan di Elite Productions.

   Cu su edad hoben e tabata un Guest DJ tambe durante programa di DJ 101 na Cool FM.

   Y esey ta di spera, pasobra Luis Angel tabata Alegre y contento, y gusta haci joke. 

   Un di su gran logro tabata cu el a wordo invita pa bay toca na Curaçao, y tabata na Club27.  Como guest DJ, el a sa di haci su best aya.

   Algo grandi ta cu recien el a caba di firma contract tambe pa e bay toca como DJ na Merca.

   Luis Angel tabata amigo di tur hende!  E no tin enemigo pasobra e ta un persona hopi social y keri.  Ora cu famianan a wordo avisa pa bay Hospital, ey nan a ricibi sosten di Slachtofferhulp cu a keda apoya nan.

   Varios DJ local riba Dialuna a expresa nan lamento cu Aruba a caba di perde un hoben talentoso cu tabatin su futuro bunita traha caba den mundo di Discjockey.  Awor tin di spera pa e resultado di investigacion pa asina por haya sa kico a pasa den e caso aki.

   Riba e potretnan por mira e haltura di como 35 pia cu el a cay.  Abao ainda por mira algun mancha di sanger cu a wordo haci limpi despues.

   Na su famia y amigonan, DIARIO ta extende su mas profundo palabra di condolencia.