Pa Nathalie Maduro:
ORANJESTAD (AAN) – Den un entrevista cu DIARIO, e directora di Departamento di Agricultura, Cria y Pesca (LVV-Santa Rosa), señora Nathalie Maduro, a expresa cu pa su persona ta un honor di traha na un ramo cu hopi ta wak’e como un trabao pa hende homber.
“Durante mi 14 aña di servicio por wak cu enberdad tin partinan mas dificil cu otro, pero mi ta kere cu, como hende muher, nos tin caracteristicanan cu ta pone nos yega mas leu den bida; un di nan ta multitask, e pasenshi di hende muher cu hopi biaha nos tin e instintonan materno tambe, y ademas ora bo tin cu aporta empathy. Algo como hende muher ta cu nos tin e caracteristica cu hopi biaha ta yuda, cu ta haci cierto procesonan mas facil”, Nathalie Maduro a menciona.
El a subraya cu e gusta su trabao y e no ta sinti cu pasobra e ta un hende muher e no por eherce un trabao cu semper hende homber a haci. El a remarca cu no solamente den sector primario, pero den hopi otro posicionnan por wak hendenan muher cu ta haciendo un tremendo trabao, den cierto cargo cu semper a wordo haci pa un ser masculino.
“Ami, sigur mi ta contento cu loke mi a logra como hende muher, pero danki tambe cu e aporte di mi coleganan masculino. Den Santa Rosa nos no ta yega ni diez hende muher, pero si mi por bisa cu nos ta traha bon hunto, y di paso mi kier manda un pabien tur nos hendenan muher, specialmente na nos cunukero, piscado y criadornan, pero na tur hende muher na Aruba. Como ser femenino nos por hopi mas di locual cu nos ta pensa. Nunca duda den esey y pabien den nos dia”, Nathalie Maduro, director di LVV a expresa.
