Director di Hospital satisfecho cu interes durante Aruba College Fair

ORANJESTAD (AAN):  E aña aki Horacio Oduber Hospital (HOH) tabata presente un bes mas durante Aruba College Fair,

cu a tuma luga den Renaissance Convention Center, riba diabierna dia 8 y diasabra dia 9 di november.

            Jacco Vroegop, director di HOH, a comenta riba e importancia di Aruba College Fair, caminda e profesionalnan ta topa pa duna informacion na e hobennan studiante. E booth di HOH tabata conta cu diferente profesionalnan pa asina duna un bista chikito di e diferente funcionnan na HOH. E tabata interesante pero alabes innovativo pa tur esnan cu a bishita e evento. Sr. Vroegop ta encurasha un y tur pa pensa hopi bon riba nan futuro y tene e compania di mas leuk den mente; esta Horacio Oduber Hospital.

            Zenadine Williams, hoben studiante, tabata presente na e booth di HOH pa haya sa mas. El a comenta cu e ta un persona cu ta gusta yuda hende y tin interes pa drenta den e ramo di cuido medico pensando riba e funcion operatie assistent y ta pa e motibo ey mes el a join Aruba College Fair pa haya un miho idea di e trabou. El a expresa cu inicialmente e demostracion di camber di operacion a sinti un tiki straño pero ora el a hacie el a sinti cu “e tin cu bay p’e”!

            Gregory Croeze, director financiero di HOH, contento  smencion cu mane nos lema ta bisa “Nos semper T’ey” y claro no a duda pa join Aruba College Fair. Croeze ta masha contento di por a mira tanto studiante canando rond pa mira cua ta e oportunidadnan cu nan tin pa sigui cu nan estudio. Ademas, el a indica cu na Aruba tin un scarsedad di nurse y specialista, pero tambe tin scarsedad di hende pa traha den e area di cuido en general. Durante Aruba College Fair, e studiantenan interesa a haya un splicacion di loke ta significa pa traha den cuido specialmente na un hospital.

            Cathleen Hernandez, Stagecoördinator HOH Academy, tabata contento y a indica cu e booth di HOH tabata bon bishita. A parti por lo menos 300 foyeto na e studiantenan interesa, esey ta sin conta e studiantenan cu a bay sin tuma un foyeto for di HOH. Esey caba ta demostra e interes di e studiantenan pa forma parti di e ekipo di HOH. A haci diferente demostracion pa e hobennan por tin un idea di e trabou.

            Horacio Oduber Hospital ta emplea mas di 1100 profesional cu ta traha diariamente pa mantene e hospital operacional. Separa di e aspectonan medico, tambe ta atende cu cuido general pero tambe cu mantencion di e cambernan y e logistica di alimentacion y tur otro aspecto cu ta encera di tin tanto pashent asina kedando 24 ora pa dia den bo edificio. Nan tur mester come, bebe, baña, haya cuido medico, tur cu otro necesidadnan, pa cual ta rekeri hopi man profesional, specialmente si tene cuenta tur e avancenan tecnologico y moderno den cual nos ta biba awendia.

            Hecho ta si cu rond mundo tin scarsedad den e industria di cuido, pa cual HOH ultimo añanan ta dedica hopi atencion na nos hobennan studiando, pa encurasha nan pa haci un carera den cuido na Aruba mes.