ORANJESTAD (AAN): E aña aki ArtisA hunto cu Directie Natuur en Milieu (DNM) ta bay organiza locual ta bay wordo yama ‘Climate Meets Fashion,
pa yuda trece concientizacion riba e problemanan di cambio di clima.
Durante un conferencia di prensa na Fusion, director di DNM Gisbert Boekhoudt a trece dilanti cu DNM pa basta aña caba ta purba influencia ciudadanonan di Aruba pa actua na un manera mas conciente riba cambio di clima.
“E aña aki nos kier a haci algo mas artistico y creativo cu locual nos a haci aña pasa y pa nos no trece mesun mensahe na e mesun manera, nos kier a envolve hendenan cu ta hopi mas creativo cu nos mes”, segun Boekhoudt.
El a sigui bisa cu pesey a ‘team up’ cu ArtisA, cu ta situa den e mesun bario cu DNM.
Segun Boekhoudt, e intencion ta pa no solamente San Nicolas, sino full Aruba ta mas conciente riba cambio di clima.
“Nos tur ta sinti e situacion di cambio di clima, unda cu awendia hopi hende ta sinti e calor y ta papia di dje”.
Ta sinti mescos cu nos ta den cushina y un hende a laga e fornu cendi.
Nos kier concientiza hende cu e fornu no ta cendi, pero cu ta nos mes a actua y nos por contribui na esaki, segun Boekhoudt, kende e aña aki e intencion ta pa haci uso di arte y moda pa trece concientizacion.
“Mi sa sigur cu durante mas occasion nos ta bay trece mas campaña di concientizacion riba cambio di clima hunto cu ArtisA y mi ta spera cu e ta bira hopi fructifero, unda cu tur hende ta cuminza actua concientemente, segun e director di Directie Natuur en Milieu.
