Directora di DIMP, Luenne Gomes-Pieters:
- Contribuyentenan tin obligacion cu impuesto pero nan tin derecho tambe
ORANJESTAD (AAN): Departamento di Impuesto (Dimp) tin e tarea pa educa contribuyentenan di impuesto entre otro comerciantenan cu no ta comprende ora nan bay riba e portal di impuesto of cu no ta comprende Hulandes, asina Directora Luenne Gomes-Pieters a duna di conoce. Den un entrevista cu DIARIO el a splica cu durante aña Dimp ta duna diferente tayer, colaborando asina cu departamentonan manera Departamento Asunto Economico (Deaci) y Enseñansa pa Empleo. Tambe nan a colabora cu taxistanan cu permitnan nobo. Recientemente a duna tayer na contratistanan chikito na DOW.
Señora Gomez-Pieters ta haci un yamada na comerciantenan chikito pa nan no tene miedo di Dimp. E Hecho ta cu si nan no entrega nan formulario y paga impuesto na tempo, nan ta haya cobransa cu boet, pero esaki no ta motibo pa no acerca e departamento pa busca informacion di kico ta nan derechonan. Contribuyentenan tin obligacion cu impuesto pero sigur tambe nan tin derecho.
Den caso di cobransanan demasiado halto pasobra formularionan no a wordo entrega na tempo, contribuyentenan tin tur derecho pa bay den bezwaar. Nan ta entrega nan obhecion y e inspector tin obligacion pa ricibi y trata esaki y tambe atende cu e sumanan cu contribuyentenan ta registra como entrada.
E directora a menciona cu varios biaha Departamento di Impuesto ta wordo mira como un departamento cu ta sali cu un sweep y saca cobransa cu boet pa esnan cu no ta cumpli cu nan obligacion cu e departamento. Departamento tey pa yuda esnan cu no ta comprende kico pa haci ora nan drenta e portal di impuesto of ora nan no ta comprende docemento y informacionnan cu ta na Hulandes.
Señora Gomez-Pieters a enfatisa cu departamento di impuesto ta duna guia riba diferente topico, entre otro; Kico ta un eenmanszaak, un NV, un VBA, of con pa mantene administracion, kico ta fracturanan cu mester warda pa entrega na esun cu ta administra, con ta calcula loonbelasting, inkomstenbelasting, BBO, winstbelasting etc.
Segun señora Gomez-Pieters, tecniconan di Dimp tin hopi aña di experencia ta duna guia detayadamente y na un manera comprendibel na cada contribuyente.
